गत वर्ष थाइल्यान्डको गुफामा फसेका १२ जना किशोर र उनीहरूका फुटबल प्रशिक्षकका बारेमा सिरियल बन्ने भएको छ। थोरै भागमा बन्ने उक्त सिरियल बनाउने सर्वाधिकार नेटफ्लिक्सले लिएको छ।
'वाइल्ड बोर्स' नामको फुटबल टोलीका यी किशोर र प्रशिक्षक गत जुन महिनामा १८ दिनसम्म पानीले भरिएको गुफामा फसेका थिए। सुरूमा सुख्खै रहेको गुफामा उनीहरू पसेपछि पानी परेको थियो। पानीको भेल छिरेपछि उनीहरू निस्किन सकेनन् र भित्रै पानीले नभेटेको सानो ठाउँमा बसेको अवस्थामा उद्धारकर्मीहरूले भेटेका थिए।
संसारभरबाट ९० जना गोताखोरहरू आएर उनीहरूको उद्धार गरेका थिए। आठ महिना अगाडिको यो घटनालाई अब नेटफ्लिक्सले सिरियलका माध्यमबाट प्रस्तुत गर्ने भएको हो।
यो सिरियल 'क्रेजी रिच एसियन्स' फिल्मका निर्देशक जोन एम. चु र थाइल्यान्डका नाट्टावुट 'बाज' पुनपिरियाले निर्देशन गर्नेछन्।
'यो सिरियलमा घटनाका साथै कसरी ती किशोरको उद्धारमा स्थानीय र विश्वभरका मान्छे जोडिए भन्ने देखाइनेछ,' नेटफ्लिक्सकी एरिका नर्थले भनेकी छन्।
'नेटफ्लिक्सकै लागि पनि थाइल्यान्ड राम्रो र महत्वपूर्ण बजार हो। त्यसैले हामी स्थानीयलाई प्रेरित गर्ने तर संसारभरले बुझ्ने कथा बनाउन चाहन्छौं,' उनले भनेकी छन्।
बाह्र किशोर र उनीहरूका प्रशिक्षक फसेको थाइल्यान्डको गुफामा संग्रहालय बनाइने पोहोरै घोषणा भएको थियो। उत्तरी थाइल्यान्डमा अवस्थित यो गुफा आकर्षक पर्यटकीय स्थान बन्ने देखिएकाले संग्रहालय बनाउने योजना भएको हो। यो थाइल्यान्डकै लामोमध्ये एक गुफा हो जसको नाम थाम लुआङ हो।
अन्तर्राष्ट्रिय सञ्चारमाध्यमका अनुसार यो संग्रहालयले फसेकाको उद्धार कस्तो ठाउँबाट कसरी भयो भन्ने देखाउनेछ।
किशोहरू ११ देखि १६ वर्षका छन् भने प्रशिक्षक २५ वर्षका। उनीहरू हराएलगत्तै खोजी तीव्र गरिएको थियो। पानीको भेल पसेको गुफाको मूलद्वारबाट करिब ४ किलोमिटर पर उनीहरू भेटिएका थिए।
उनीहरूलाई नवौं दिन मात्र जलसेनाका गोताखोरहरूले फेला पारेका थिए। पानीको भेल भएको र निस्कने ठाउँ साँघुरो भएकाले १८ दिनपछि उनीहरूलाई पालैपालो निकालिएको थियो।
उद्धार सुरु हुनुअघि फसेकाहरूलाई अक्सिजन पुर्याएर फर्कने क्रममा एक गोताखोरको मृत्यु पनि भएको थियो। यसपछि स्थिति झनै चिन्ताजनक भए पछि अनेक उपाय लगाएर फसेकाको उद्धार गरिएको थियो।
(बिबिसीको सहयोगमा)