बलिउड अभिनेत्री कंगना रनावत निर्देशित, निर्मित तथा अभिनित 'मणिकर्णिका'ले वक्सअफिसको मानक मानिएको सय करोडको आँकडा पार गरेको छ। सिनेमाले पाँच सातामा सो आँकडा पार गरेको हो। सिनेमाले सो आँकडा छुन मुश्किल पर्ने अनुमान हुँदै आएको थियो।
सिनेमाले यो आँकडा पारे गरेपछि मख्ख परेकी कंगनाले निर्देशकिय डेब्यू सिनेमाले सय करोड पार गर्नु आफ्ना लागि विशेष भएको प्रतिक्रिया दिएकी छन्।
सिनेमाले यो कमाइ भारतबाट गरेको हो। उसको विश्वव्यापी कमाई १५२ करोड भारू पुगेको छ। सिनेमा अझै प्रदर्शनमा रहेको छ।
निर्देशक क्रिस र अभिनेता सोनु सुदसँगको लफडाको कारण सुरूदेखि नै विवादमा परेको सिनेमाले रिलिजको पहिलो दिन ८.७५ करोड भारूको कमाइ गरेको थियो। पछि सिनेमाले वक्सअफिसमा रफ्तार बढायो र रिलिजको पाँच दिनमा ५० करोड भारू पुर्याएको थियो। सिनेमा भारतका ३ हजार र डायस्पोराका ७ सय पर्दामा रिलिज भएको थियो।
यसैगरी वर्षको पहिलो ब्लकबस्टर बलिउड सिनेमा बनेको 'उरी: द सर्जिकल स्ट्राइक' ले आफ्नो कमाइलाई २२५.५ करोड भारू पुर्याएको छ। विक्की कौशलको पहिलो सोलो ब्ल्कबस्टर बनेको सिनेमा सन् २०१६ मा भारतले पाकिस्तानमा गरेको सर्जिकल स्ट्राइकमा आधारित थियो।
