काठमाडौं अन्तराष्ट्रिय पर्वतीय फिल्म महोत्सव (किम्फ)को १६ औं संस्करणमा अन्तर्राष्ट्रिय प्रतिष्पर्धातर्फ साहरा मनी मसावी ‘अ थाउजन्ड गर्ल्स लाइक मी’ले प्रथम पुरस्कार जितेको छ ।
यस्तै नेपाल पानोरामा अन्तर्गत आख्यानमा अविनास विक्रम शाहको ‘तटिनी’ र गैरआख्यान विधामा विद्या चापागाईं र कमल कुमारको ‘मरिसकेको मान्छे’ ले उत्कृष्ट भए।
राष्ट्रिय सभागृह र नेपाल पर्यटन बोर्डमा मंगलबार सम्पन्न पाँच दिने किम्फमा ‘अ थाउजन्ड गर्ल्स लाइक मी’ले १ हजार ५ सय अमेरिकी डलर नगद पुरस्कार जितेको छ।
त्यस्तै अरुण भट्टराई र डोरोत्यो जुर्बोको ‘द नेक्स्ट गार्डियन’ र मिक्लास कल्सटोर्म र मार्टिनी कार्टिनेमको 'इस्टर्न मेमोरिज'ले क्रमश दोस्रो र तेश्रो हुँदै १ हजार डलर तथा ५ सय डलर पुरस्कार जिते।
नेपाल पानारोमामा आख्यान र गैर आख्यानले क्रमशः नेपाली रुपैयाँ एक लाख र ७५ हजार पुरस्कार जितेका छन्।
यस्तै मुनमुन धलेरियाको ‘एन अनसर्टेन विन्टर’ उत्कृष्ट पर्वतीय फिम हुँदा प्रसुना डंगोलको ‘डोल्पा डायरी’ फिल्म उत्कृष्ट साहसिक फिल्म घोषित भयो। दुबै फिल्मले १-१ हजार अमेरिकी डलरको नगद पुरस्कार पाए।
छोटो फिल्म ‘सुपर मङ्क’ सर्वाधिक दर्शकहरूको रोजाइमा पर्दै ‘अडियन्स अवार्ड’ जित्न सफल भयो । फिल्मले अवार्डसँगै ५० हजार रुपैयाँ जितेको छ।
किम्फमा ‘ट्राभल इज एन अटिच्युड’ शीर्षकमा ३५ वर्ष मुनिका युवाहरुका लागि आयोजित सर्ट फिल्म प्रतियोगितामा सुजन गौतमको ‘मी एन्ड माई इन्डेभर’ ले उत्कृष्ट हुँदै २५ हजार रुपैयाँ जितेको छ।
समापनमा किम्फका अध्यक्ष बसन्त थापाले महोत्सव सफल भएकोमा खुशी र सकिन लागेकोमा दु:खी भएको बताए।
‘वुमन मुभ माउन्टेन्स’ नारा रहेको किम्फमा ३१ वटा देशहरुका ७० भन्दा बढी फिल्महरु देखाइएको थियो।