नेपाली सिनेमाकी प्रथम नायिका भूवन चन्द निर्माता बनेकी छन्।
आइतबार राजधानीमा आयोजीत एक कार्यक्रमका विच 'आमा' अभिनेत्री चन्दले 'साइनो' नामक सिनेमा निर्माणको घोषणा गरेकी हुन् । रमेश थापाको डेब्यू निर्देशन रहने सिनेमाबाट नयाँ अभिनेता राज कुमार डेब्यू अभिनेता बन्दैछन् ।
भारतमा बस्दै आएका नव-अभिनेता राजकुमारले अभिनय सिकाउन नेपाल आएपनि भूमिका मन परेका कारण सिनेमामा अभिनय गर्न लागेको बताए ।
सिनेमा ‘साइनो’मा निता ढुंगाना, मिरुना मगर, राज कुमार, भुवन चन्द, बसुन्धरा भुषाल, मदनदास श्रेष्ठ, राजा राजेन्द्र पोखरेल लगायतका कलाकारको मुख्य भुमिका रहने छ ।
अभिनेत्री मिरुनाले नेपालकी प्रथम अभिनेत्रीको फिल्ममा आफू आबद्ध हुनु पाउनु सौभाग्यको कुरा रहेको बताइन् ।
सिनेमामा रामेश्वर कार्कीको छायांकन, रामजी लामिछानेको कोरियोग्राफी, रोशन विक्रम भट्टराइको द्धन्द्व, बसन्त सापकोटाको संगीत, बनिष शाहको सम्पादन रहने छ ।
काठमाडौं, काभ्रे, रसुवा, नुवाकोट, मकवानपुर, सिन्धुपाल्चोक लगायतका विभिन्न रमणीय ठाँउमा सिनेमाको छायाँकन गरिनेछ । सिनेमाको छायाँकन अवधि ४० दिनको रहने निर्माण टिमले जनाएको छ ।
सिनेमालाई अभिमन्यू निरवीले लेखेका हुन्। सिनेमाले त्रिकोणात्मक प्रेमकथा पेस गर्नेछ।