साहित्यकार दामोदर पुडासैनी ‘किशोर’ को कवितासंग्रह ‘सहरबिनाको सहर’ प्रकाशित भएको छ। तराई र मधेसका विभिन्न जिल्लाहरूमा रहेर पुडासैनीले रचेका तराई–मधेस केन्द्रित ५२ कविताहरू यस संग्रहमा समावेश छन्।
वरिष्ठ समालोचक एवम् साहित्यकार डा. राजेन्द्र बिमलले पुडासैनीको कविता संग्रह ‘सहरबिनाको सहर’ नेपाली भाषामा रचिएको तराई–मधेस केन्द्रित पहिलो कृति भएकोले यसको विशेष महत्व रहेको बताए। ‘सहरबिनाको सहर’ले तराई–मधेसका समस्या, संस्कार, भूगोल र सम्भावना समेटेर नयाँ ढंगबाट अघि बढाउन खोजेको उनले बताए। यस किसिमको कृतिले हिमाल, पहाड र तराईका जनताबीचको भावनात्मक सम्बन्ध अझ प्रगाढ हुने पनि उनले बताए।
कवि पुडासैनीले मधेसको विविध जीवन, परिवेश र मनोविज्ञानको काव्यिक प्रतिवेदन प्रस्तुत गरेका छन्। यहाँभित्रका पीडा, निदान र उपचार उल्लेख गरेका छन्।
‘मधेसमा हिमाल उठाउन खोज्नेहरू र हिमालमा मधेस ब्यूँझाउन खोज्नेहरू, आँखाका नानी हुन् हामी सबैका। मैले हिमालको पानी र मधेसको जवानी, मिसाउन खोजेको हुँ नेपालभरि,’ उनले भनेका छन्।
पुडासैनीको यो कविता संग्रह साझा प्रकाशनले प्रकाशमा ल्याएको हो। ‘सहरबिनाको सहर’ प्रकाशन गर्नुको औचित्य पुष्टि गर्दै साझा प्रकाशन लेख्छ, ‘देशबिना मधेस, मुुटुबिना शरीरको कल्पना गर्न नसकिने यथार्थको प्रतिबिम्ब हो देश–मधेस। बोलेको छ आवाजहरू सशक्त–यथार्थको। मधेसमा रचिएका कविताहरुको सुन्दर प्रस्तुति बनेको छ सहरबिनाको सहर।’
पुडासैनीको यो चौधौं कृति हो। यसअघि उनका सात कविता संग्रह, पाँच नियात्रा संग्रह र एक दर्शन कृति प्रकाशित छन्। पुडासैनी नेपाल सरकारका सह–सचिव अर्थात् महालेखा परीक्षकको कार्यालयमा नायब महालेखा परीक्षकको रुपमा कार्यरत छन्।