सुनसरीको इटहरीमा करीब ६ करोड लागतमा सुविधा सम्पन्न फिल्म हल सञ्चालनमा आएको छ।
इटहरी उपमहानगरपालिका–४ मा पाँच कठ्ठा जमिनमा निर्माण गरिएको ‘इलाइट चलचित्र भवन’ को शुक्रबार उपमहानगरपालिकाका प्रमुख द्वारिकलाल चौधरीले उद्घाटन गरे।
भवनमा दुई वटा प्रदर्शन हल छन्। एउटा हलको क्षमता २०८ जना अटाउने तथा अर्को हलको क्षमता १०८ जना अटाउने रहेको छ । चलचित्र निर्माता छवि ओझा, चलचित्र वितरकका रुपमा कार्यरत कुवेर शर्मा र कलाकार पृथ्वी प्रसार्इं लगायतको लगानीमा सो हल सञ्चालनमा आएको हो ।
उच्च गुणस्तरिय साउण्ड सिस्टम र भिडियो क्वालिटी भएको हलमा फोल्डिङ सिस्टमका आरामदायी सिट राखिएको छ । नेपाली चलचित्रका लागि २ सय र अन्य भाषाका चलचित्रका लागि ३ सय टिकट दर राखिएको उनीहरले
बताएका छन् ।
इटहरीमा यसअघि सञ्चालनमा रहेका श्रीकृष्ण टाकिज र पशुपति चलचित्र भवन हाल बन्द छन्। उपमहानगरपालिकामा व्यवसायी रेवती दुलालले सञ्चालन गरेको दुई वटा हल सहितको चलचित्र आइसिनेमा सञ्चालनमा छ।