‘झिमिक झिमिक झ्याप’मा उज्यालो र अन्धकारकाे लुकामारी (तस्बिरहरु)

असार ३ गतेसम्म मञ्चन हुनेछ।

सेतोपाटी संवाददाता

काठमाडौं, जेठ ३०

झिमिक झिमिक झ्याप...

जब बत्ती झ्याप्प निभ्छ तब नाटकमा रोमाञ्चक घटना घट्न थाल्छन्।

खासमा नाटकमा प्रकाशको प्रभाव उल्टाइएको छ। नाटक अन्धकारमा सुरू भएको हुन्छ। पात्रहरू त्यही अन्धकारमा देख्छन्। नाटक सुरू भएको केही समयपछि स्टेजमा ‘शर्ट सर्किट’ हुन्छ र उज्यालो छाउँछ जबकी त्यो नाटकको अन्धकार हो। बीचबीचमा सलाई एवं टर्च लाइटका प्रकाशमा पात्रहरूले देख्न सक्ने उज्यालो छाउँछ। तर त्यस उज्यालोमा स्टेजको प्रकाश भने घट्दै जान्छ।

यही उज्यालो र अन्धकारमा नाटकले लुकामारी खेल्छ। पात्रहरूले पनि झूटको लुकामारी खेलिरहन्छन्।

थिएटर भिलेजको नाटक ‘झिमिक झिमिक झ्याप’ मा यस्तै हुन्छ। नाटकमा आधुनिक समाजमा मानिस कसरी एक अर्कालाई झुक्काएर बाचिँरहेका छन् भन्ने देख्न सकिन्छ। एक संघर्षरत कलाकारले झूटको आडमा महंगो मूल्यमा बेच्न खोजेको मूर्ति र प्रेमिकाको बुवालाई विवाहको लागि मनाउन गरेको संघर्षलाई रोमाञ्चक ढंगले नाटकमा देखाइएको छ।

नाटक ‘झिमिक झिमिक झ्याप’ मण्डला नाटकघरमा मञ्चन भइरहेको छ। बेलायती नाटककार पिटर स्याफरको नाटक ‘ब्ल्याक कमेडी’ मा आधारित रहेको नाटकको दिलीप रानाभाट र आलोक लम्सालले नेपालीमा अनुवाद गरेका हुन्। दिलिप रानाभाटको निर्देशन रहेको नाटकमा आयुष्ना गिरी, एच के अधिकारी, प्रशंसा पौडेल, सन्देश शाक्य, आयुष्मान प्याकुरेल, प्रस्तुति भट्टराई, श्रवणकुमार राना र विपीन रिमालले अभिनय गरेका छन्।

नाटक असार ३ गतेसम्म मञ्चन हुनेछ।