सर्लाहीको गोडैता नगरपालिकामा १३ जनामा कोरोनाभाइरस पोजेटिभ भेटिएपछि उक्त नगरपालिकालाई तत्कालका लागि सिल गर्ने निर्णय गरिएको छ।
गोडैता नपाको विभिन्न वडामा गरी १३ जनामा कोरोना संक्रमण देखिएपछि मेडिकल पसल बाहेकका सबै पसल बन्द गर्ने निर्णय भएको गोडैता नगरपालिकाका नगरप्रमुख देवेन्द्र कुमार यादवले जानकारी दिए।
नगरपालिकामा रहेको दुइटा क्वारेन्टाइनमा ८० जना रहेकोमा तिनीहरूको अहिले स्वाब परीक्षण समेत नभएको र जाँच गरिएकामध्ये २८ जनाको रिपोर्ट आउन अहिले बाँकी नै रहेको छ।
नगरप्रमुख यादवका अनुसार नपाको वडा नं. १ देखि १२ सम्म पूर्ण रूपले सिल गरिएको हो।
उनले भने, ‘आज एकै दिनमा यहाँ १३ जनामा कोरोनासंक्रमण पुष्टि भएको छ। जाँच गर्न दिइएकामध्ये २८ जनाको रिपोर्ट आउनै बाँकी छ र धेरैको स्वाब पनि संकलन भएको छैन। त्यसैले जबसम्म सबैको रिपोर्ट आउँदैन तबसम्म नगरपालिका सिल नै रहन्छ।’
नगरपालिकाले यस अवधिमा औषधि पसलबाहेक अन्य सबै पसल तथा वित्तीय संस्था, गैरसरकारी संघ संस्था, नगरकार्यपालिकाको कार्यालय अनिश्चितकालको लागि बन्द गरेको हो।
यता, सर्लाहीका प्रमुख जिल्ला अधिकारी मोहन बहादुर जिसीले भने कोरोना संक्रमित भेटिएका क्वारेन्टाइनलाई अहिलेलाई सिल गरिए पनि नगरपालिकालाई नै सिल गर्नेबारे निर्णय भइनसकेको बताए।
उनले भने, ‘संक्रमित भेटिएका क्वारेन्टाइन सिल गरे पनि नगरपालिका सिल गर्नेबारे छलफल जारी नै रहेको छ।’