सातौं राष्ट्रिय खेलकुद प्रतियोगितामा पश्चिमाञ्चलले पहिलो स्वर्ण हात पारेको छ। आइतबार पोखरामा भएको लन टेनिसमा पश्चिमाञ्चलले पहिलो स्वर्ण जितेको हो ।
पुरूष टिम इभेण्टमा पश्चिमाञ्चलले एपिएफलाई ३–० ले पराजित गर्यो। पश्चिमाञ्चलका कुमार अधिकारीले श्रीराम मगरलाई ६–३, ६–१ मा तथा नवीन मगरले सन्तोष खत्रीलाई ७–६ र ६–३ को सेटमा पराजित गरेका हुन्।
यो जीत सँगै प्रतियोगितामा सहभागि पाँच विकास क्षेत्र मध्ये पहिलो स्वर्ण जित्ने पश्चिमाञ्चल भएको छ। अहिलेसम्म विभागीय बाहेक अन्य कुनै पनि विकास क्षेत्रले स्वर्ण जित्न नसकेको पश्चिमाञ्चल क्षेत्रीय खेलकुद विकास समितिका अध्यक्ष खगराज पौडेलले जानकारी दिए।
टेनिस खेलमै नेपाल पुलिस क्लवले एक स्वर्ण पदक जितेको छ। पुलिसले आर्मी क्लवलाई ३–० ले पराजित गर्दै महिलातर्फको टिम इभेण्टमा स्वर्ण जितेको हो। पुलिसका मायिका राणाले अभिलाषा विष्टलाई ६–१, ६–१ ले, मायांका राणाले ऐरा एम राउतलाई ६–१, ७–५ ले तथा मायांका र मायिकाको जोडीले ऐरा र अभिलाषाको जोडीलाई ६–०, ६–० को सेटमा पराजित गर्दै पुलिसुका लागि स्वर्ण पक्का गराएका हुन् ।
पोखरा रंगशालामा आइतबार सम्पन्न अन्य प्रतिस्पर्धाहरुमा मेन्स सिंगलतर्फ पूर्वाञ्चलका महेश श्रेष्ठले मध्यमाञ्चलाक अन्जन थिङलाई, मध्य पश्चिमाञ्चलका चन्द्रबहादुर थापाले पूर्वाञ्चलका डेगेन्द्र श्रेष्ठलाई तथा मेन्स डबलमा मध्य पश्चिमाञ्चलका प्रदिप शाह र हिमाल शाहको जोडीले मध्यमाञ्चलका शिवराम मगर र अदित सुवेदीलाई पराजित गर्दै क्वाटरफाइनलमा स्थान बनाए।
त्यस्तै महिला सिंगलतर्फ पूर्वाञ्चलका सलोनी तामाङ्गले मध्यमाञ्चलका आल्सा रेग्मीलाई, एपिएफका विभुती कार्कीले मध्यमाञ्चलका रायना शाहलाई, एपिएफका एनि माथेमाले पश्चिमाञ्चला सुभांगि लक्ष्मी शाहलाई पराजित गर्दै क्वाटरफाइनलमा स्थान बनाएका छन् ।
