मंसिरको पहिलो साता राष्ट्रिय खेलकुद परिषद्का सदस्य–सचिव केशवकुमार बिष्टसहितको अनुगमन टोली विराटनगर आउँदा पानी र हिलोका कारण क्रिकेट मैदानमा प्रवेश गर्न पनि सकेका थिएनन्। उनीहरूलाई त्यतिबेला लागेको थियो, सातौं बृहत राष्ट्रिय खेलकुद प्रतियोगिताका लागि बैजनाथपुर क्रिकेट मैदानलाई छनोट गरेर कुनै गल्ती त गरिएन्।
तर, एक महिनाको अवधिमा बैजनाथपुर क्रिकेट मैदानको फेरिएको अनुहार देखेर सदस्य–सचिव बिष्ट मात्र होइन, परिषद्का कर्मचारी पनि यतिबेला दंग परेका छन्। असम्भव झै मानिएको बैजनाथपुरस्थित क्रिकेट मैदानको अनुहार एक महिनाको अवधिमा पुरै फेरिएको छ।
सातौं राष्ट्रिय प्रतियोगिताअन्तर्गत पुरुष क्रिकेटको खेल पुस ९ देखि सुरु हुँदैछ। यो अवधिमा मैदानलाई खेल्न हुने बनाउन स्थानीय पूर्व क्रिकेटरहरूको एउटा टोली रातदिन खटिरहेको छ। गत महिनासम्म पीचदेखि दक्षिणतर्फको भाग डेढदेखि दुई फिटसम्म गहिरो थियो। पीचको अवस्था पनि खराब थियो।
तर, एक महिनाको अवधिमा २ वटा टर्फ विकेट तयार भइसकेको छ भने ३० यार्डको वरिपरि घाँसको चपरा ओछयाउने कामसमेत पुरा भइसकेको छ। बाँकी काम रकम अभाव र समयका कारण पुरा भएको छैन्। तर, प्रतियोगिता खेल्न हुने बनाउन मैदानमा रोलर पेल्ने कामलाई तीब्रता दिइएको छ।
‘म छक्क परेको छु। गत महिना हिलो र पानीका कारण मैदानमा प्रवेश नगरि हामी बाहिरिएका थियौं। बाहिरै त्यति खाल्डाखुल्डी थिए। भित्र त कति थिए होलान्,’ गत महिना अनुगमनका लागि बैजनाथपुर पुगेका राष्ट्रिय खेलकुद परिषद्का सदस्य गंगाबहादुर थापामगरले सेतोपाटीसँग भने।
परिषद्ले मैदान निमार्णको काम द्रुतगतिमा होस् भनेर मोरङ जिल्ला क्रिकेट संघका उपाध्यक्ष मोहम्मद साद ‘बाबु’ को अध्यक्षतामा ७ सदस्यीय उपभोक्ता समिति गठन गरिएको थियो। जसलाई काम गर्न ६० लाख छुट्याइएको थियो।
पूर्व अन्तर्राष्ट्रिय अम्पायर तथा क्युरेटर सिरिस उपाध्यायको रोहवरमा क्रिकेट मैदानलाई सम्याउने र पिच निमार्ण गर्ने कार्य भएको थियो। उनका अनुसार मैदानको लेबल मिलाउन एक हजार टिपर माटो प्रयोग गर्नु परेको थियो। यस्तै, पिच निमार्णका लागि ८ इन्ची गहिरो खनेर त्यसमा २ इन्ची गिट्टि र ८ इन्ची माटो हालिएको छ। समयको पावन्दीका कारण तीनवटा पिच भनिएपनि २ वटा मात्र बनाउन सम्भव भएको उनले बताए।
‘२ वटा पिच तयारी अवस्थामा छ। एउटा पिच समय अपुग भएका कारण तयार पार्न सकिएन,’ क्युरेटर उपाध्यायले बताए।
बैजनाथपुरको क्रिकेट मैदानको गोलाई पिचबाट ८० मिटर रहेको छ। यसपालि ६५ मिटरमा २०–२० फरम्याटमा प्रतियोगिता हुँदैछ। ३० मिटरको गोलाईसम्म हरियो घाँस बिछ्याउने काम सम्पन्न भएपनि बाँकी ३५ मिटरको काम समय अभाव र पैसाको कारण असम्भव भएको उपभोक्ता समितिका अध्यक्ष मोहम्मद साद ‘बाबु’ ले टेलिफोनबाट सेतोपाटीलाई जानकारी दिए। उनी बैजनाथपुरको मैदानलाई कीर्तिपुरस्थित टियु मैदानजस्तै अन्तर्राष्ट्रियस्तरको बनाउन थप ५० लाख आवश्यक भएको बताउँछन्।
‘हामीलाई अझै आउट फिल्डको कामका लागि पैसा आवश्यक छ। एउटा चेन्जिङ रुम बनेको खण्डमा अन्तर्राष्ट्रियस्तरको प्रतियोगिता आयोजना गराउन कुनै कुराले रोक्दैन,’ उनले भने। उनी सरकारले आवश्यक रकम उपलब्ध गराएको खण्डमा अर्को वर्षदेखि आफूहरूले अन्तर्राष्ट्रियस्तरको प्रतियोगिता गराउने प्रतिबद्धता जनाउँछन्।
क्युरेटर उपाध्याय तीन महिनाअघि मात्र प्रतियोगिता आयोजनाका लागि कामको थालनी भएको भए यो भन्दा राम्रो अवस्थामा मैदान देखिने बताउँछन्। ‘यो एक महिनामा पनि अभूतपूर्व काम भएको छ। परिषद्ले प्रतियोगिता समापनपछि पनि मैदान तयारीका लागि केही पैसा निकासी गरोस् भन्ने आग्रह गर्दछु,’ उनले भने।
