तेस्रो मुलुकबाट आयातित सुपारी अवैध ढङ्गले भारततर्फ निकासी गर्ने क्रममा प्रहरीको गस्ती टोलीले आज करिब चार हजार किलो सुख्खा सुपारी बरामद गरेको छ।
मेची नगरपालिका–१० स्थित चर्च क्षेत्रमा नकलन्दाबाट खटिएका प्रहरीको गस्ती टोलीले ७०० किलो सुख्खा सुपारी बरामद गरेको हो।
भारततर्फ निकासी गर्ने क्रममा प्रहरीको टोलीले नियन्त्रणमा लिन खोज्दा ३०/४० जनाको तस्करको समूहले प्रहरीमाथि ढुङ्ग मुडा प्रहार गर्न थालेपछि प्रहरीले स्थितिलाई सामान्य बनाउन ३०३ राईफलबाट ३ राउण्ड (ब्ल्याङक) हवाई फायर गरी तस्करहरुलाई तितरवितर बनाएको प्रहरीले जनाएको छ।
त्यसैगरी, आज बिहान साढे ६ बजे प्रहरीको गस्ती टोलीले मेची नगरपालिका–१० को गैरीगाउँमा इलाका प्रहरी कार्यालय काँकडभिट्टाबाट गएको प्रहरी टोलीले शङ्का लागि खोजबिन गर्दा बेवारिसे अवस्थामा दुई हजार १०० किलो सुपारी बरामद गरेको हो।
यसैगरि, आजै बिहान ९ :३० बजे बाहुनडाँगी–२ स्थित मेची खोलाको किनारबाट एक हजार ४५ किलो र मेची नगरपालिका–११ बाट ६० किलो सुपारी बरामद गरेको प्रहरीले बताएको छ।
सुपारी छाडी फरार भएकोले उक्त सुपारी प्रहरीले बरामद गरी भन्सार दाखिला गरेको र घटनामा संलग्न व्यक्तिको खोजी भइरहेको प्रहरीले जनाएको छ।