विकास निर्माणमा सडक विभाग, खानेपानी संस्थान (केयूकेएल), टेलिकम र विद्युत प्राधिकरणबीच समन्वय आवश्यक भएको चेत खुलेकोे तीसौं वर्ष भइसक्यो।
राष्ट्रिय योजना आयोगका ठेलीदेखि ती निकायका कार्यक्रममा समन्वयको रट लगाइएको हुन्छ। तर, लापरबाही सधैं जस्ताको तस्तै।
ललितपुर झम्सीखेल अरूण थापा चोक अहिले सडक र खानेपानीबीच समन्वयको कतिसम्म अभाव छ भन्ने नमूना बनेको छ।
दश दिनअघि गरिएको आलो पिच सोमबार खानेपानीले ग्वाम ग्वाम खनिरहेको थियो। त्यहाँ पाँच फिट चौडाई, १३ फिट लम्बाईको खाल्टो खनिएको छ। चार फिटभन्दा बढि गहिर्याएर फालेको माटोले टलक्क टल्केको वरिपरिको पिच पनि धुलाम्मे बनाइदिएको छ।
खानेपानीले डिभिजन सडक कार्यालयसँग समन्वय गरेर दश दिनअघि मात्र यो काम गरेको भए यो बेथिती हुने थिएन।
यस्तो लापरबाही किन त?
खानेपानी संस्थान जावलाखेल प्रमुख चीत्रप्रकाश मास्केले भने, 'पिच हुनुभन्दा अघि नै काम सक्नेगरि सडकको अनुमति लिएका थियौं। तर, पाइप फिटिङ्का समान बेलैमा आइनपुगेकाले पहिला काम गर्न भ्याइएन।'
अहिले पनि सडक विभागसँग अनुमति लिएरै पिच खनेको उनले बताए। 'अहिले सामान आइपुग्यो, पिच खन्नैपर्यो,' मास्केले आफ्नो कामको बचाउ गरे।
काठमाडौं, ललितपुरका अन्य धेरै सडक जस्तै विस्तार गरेपछि झम्सीखेलबाट कुपण्डोल निस्कने बाटो पनि झण्डै छ महिनादेखि कच्ची जस्तै थियो। 'बेलैमा पाइप मर्मतसम्भार नगरेकाले अहिले पिच भत्काउनुपर्यो' भन्ने कुनै पीडा भाव मास्केको मुहारमा झल्किदैनथ्यो।
डिभिजन सडक कार्यलयका प्रमुख इन्जिनियर हरीभक्त पोखरेलले भने पीच खन्न अनुमति नै नदिएको बताएका छन्।
'पीच गरेपछि कुनै पनि सडक दुईवर्ष सम्म कसैलाई छुन दिदैनौं,' उनले भने 'भर्खर पीच गरेको अरूण थापा चोकमा हामीले कुनै अनुमति दिएका छैनौँ।'
बरू सडक विभागले पिच गर्न नभ्याउँदै खानेपानी र विद्युत प्राधिकरण जस्ता निकायले खनेर कुरूप बनाइदिने गरेको गुनासो उनले गरे।
खानेपानीले सडकको अनुमति नै नलिई पिच खनेको भए के हुन्छ?
'यसरी बाटो खनेको देखेमा सडकले पक्राउ नै गर्ने गरेको छ,' पोखरेलले भने। तर झम्सिखेलको यो खाल्डोबारे भने उनीहरू बेखबर नै भएजस्तो गरे।
जिम्मेवार निकायले नै मनपरी गरेर हैरान पारेको गुनासो पोखरेलको छ। 'किन पीच खन्यौं भनेर हामीले सोध्ने हो भने खानेपानी वा विद्युत प्राधिकरणबाट सधै एउटै जवाफ आँउछ– माथिको आदेश,' उनले दुखेसो गरे।
हेर्नुहोस् जिम्मेवार निकायको तमासा