काठमाडौं, चैत २१ (सेतोपाटी)– दुई काखे बच्चीको ज्यान जाने र उनीहरूकी १९ वर्षीय आमासहित तीनजना बेपत्ता हुनेगरी पोखरा बेगनास तालमा भएको दुर्घटनाको कारण हो– हेलचेक्र्याइँ ।
पोखराकै रामबजारबाट ड्राई पिकनिक मनाउन बेगनास पुगेका आठजना चढेको डुंगा हावाहुरीले गर्दा तालको बीचमा पल्टिएको थियो ।
उनीहरुले चालक नलिई आफै डुंगा लिएर गएका थिए । हावाहुरीमा नियन्त्रण गर्न सक्ने सिप नभएकाले पनि डुंगाले नियन्त्रण गुमाई दुर्घटना भएको प्रारम्भिक ठहर प्रहरीले गरेको छ ।
‘उहाँहरु आफै डुंगा लिएर जानुभएको रहेछ,’ कास्की प्रहरी प्रवक्ता रविन्द्र पौडेलले भने, ‘ठूलो हुरी आयो, उहाँहरुले नियन्त्रण गुमाएर यो अनिष्ट भयो भन्ने हामीलाई लागेको छ ।’
घटना हुनेबित्तिकै किनारमा रहेका अरु डुंगाका चालक उद्घारमा पुगेका थिए । उनीहरुले तीन वर्षकी अनुष्का गुरुङ र दुई वर्षीय इभिना गुरुङलाई उद्घार गरी अस्पताल पु¥याए । तर, अस्पतालले ती दिदीबहिनीलाई बचाउन सकेन ।
ती नानीहरूकी १९ वर्षीय आमा सुषमा पनि तालमा बेपत्ता छिन् । हराइरहेका अन्यमा प्रकाश गुरुङ र पुष्पा गुरुङ छन् । पौडेर बाँचेकाहरूमा ३० वर्षीया रीता गुरुङ, नौ वर्षीय यमकुमार गुरुङ र १३ वर्षीय सिमरन गुरुङ छन् । पिकनिकमा गएका ४ जना भने डुंगा चढेका थिएनन् ।
प्रहरीका अनुसार बेगनास तालको दक्षिण किनारबाट करिब ४ सय मिटर पर डुंगा पल्टिएको थियो ।
पौडेलका अनुसार डुंगाको क्षमताभन्दा बढी यात्रु भएकाले पनि दुर्घटना निम्तिएको हो । ‘एउटा डुंगामा ५ जनाभन्दा बढी हुनु सुरक्षित हैन,’ उनले भने, ‘आठ जना चढ्नुभएछ, बर्बादै भयो ।’
