भिरबाट लडेर गम्भीर घाईते बनेकी जाजरकोट पजारू गाविस ९ की कल्पना रोका उपचार खर्च बुझाउन नसक्दा उपचारपछि पनि अस्पतालमै बस्न बाध्य भएकी छिन्।
३६ दिन अघि घाँस दाउरा जाँदा भिरबाट लडेर गम्भिर घाईते बनेकी २७ वर्षिय कल्पना अहिले उपचार पुरा भए पनि बुटवलको चौराह अस्पतालमा महिला वार्डको ५ नं. बेडमा आर्थिक अभावसँग छटपटिई रहेकी छन्।
छाती, पेट र टाउकोमा गम्भीर चोट लागेपछि भेरी अस्पताल र नर्सिङहोममा उपचार सम्भव नभएपछि अस्पतालले उपचारका लागि बुटवल रिफर गरेको थियो। भिरबाट लडेपछि १२ दिनपछि मात्र होस खुलेको कल्पनाको अहिले टाउकोको अप्रेशन भइसकेको र उनको अवस्था सुधारउन्मुख रहेको अस्पतालले बताएको छ ।
श्रीमतीको उपचारका लागि ५० हजार रूपैया लिएर आएका कल्पनाका श्रीमान राजेन्द्र रोका अस्पतालको बेडमा श्रीमतीको स्याहार सुसारमा लाग्नुपर्दा पैसाको जोहो गर्न पनि नसकेको बताउँछन्।
अस्पतालले उपचार वापत २ लाख १३ हजार रूपैया बुझाउन बाँकी रहेको जनाएपछि घरमा पालेका भेंडा बेचेर रकम लिएर आउँदै गरेका राजेन्द्रका कान्छा बुवा विर बहादुर रोकाको पनि चार दिन अघि जांजरकोटमा भएको बस दुर्घटनामा परि मृत्यु भएपछि रोका परिवारलाई झनै ठूलो बज्रपात परेको छ।
भेंडा बेचेको ३ लाख रूपैया लिएर बुहारीलाई घर लैजान आउँदै गरेका वीर बहादुरको उपचारको क्रममा आईतबार मृत्यु भएको राजेन्द्रले बताए। भेंडा पालेर जिवीकोपार्जन गर्दै आएको रोका दम्पतीका ११ र ७ वर्षका दुई छोरी र ४ र डेढ वर्षका २ छोरा छन्।
श्रीमतीको उपचारको लागि जिवीकोपार्जनको लागि पालिएका सबै भेंडा विक्री गरे पनि रकम हात नपरेपछि चिन्ता थपिएको राजेन्द्रले बताए।
कल्पनाको सहयोग जुटाउँदै दाह्री ग्याङ
आर्थिक अभावको कारण उपचारपछि पनि अस्पतालबाट डिष्चार्ज हुन नसकेकी कल्पनाको लागि बुटवलमा सामाजिक क्षेत्रमा कृयाशिल दाह्री ग्याङ समूहले आर्थिक संकलन अभियान सुरु गरेको छ ।
समूहले कल्पनाको उपचारका लागि एक व्यक्तिबाट १० रूपैया संकलन अभियान शुरु गरेको छ । कल्पनाको सहयोगको लागि आईतवार साँझ सांगितिक कार्यक्रम मार्फत पनि रकम संकलन गर्न शुरु गरेको समूहले जनाएको छ ।
चार दिनदेखि शुरु गरिएको १० रूपैया अभियानबाट १ लाख १० हजार रकम संकलन भएको समूहका संयोजक सुरज क्षेत्रीले जानकारी दिए।
समूहका अभियानमा स्थानीय कलाकारहरुले समेत साथ दिएका छन्। कलाकारहरु बसन्त श्रेष्ठ, अर्जुन मिश्र, अमिर कुँवर, आरती रुचाल, शंकर न्यौपाने लगायतका कलाकारहरुले आईतवार गरिएको सांगितिक कार्यक्रममा निशुल्क रुपमा प्रस्तुति दिएको समुहका प्रवक्ता गणेश पन्थले जानकारी दिए।
समूहले अस्पतालमा बुझाउनुपर्ने रकम अझै अपुग भएकोले आर्थिक सहयोगको लागि दाताहरुलाई आग्रह गर्नुको साथै अस्पताललाई पनि केहि रकम छुट गर्न आग्रह गर्ने जनाएको छ ।
अशक्त तथा आर्थिक समस्यामा जुधेका व्यक्ति तथा समुदायलाई विभिन्न माध्यमबाट सहयोग जुटाउने उद्धेश्यले १३ महिना अघि स्थापना गरिएको दाह्री ग्याङ समूहले यसअघि आत्मशान्ति अनाथआश्रम मणिग्रामलाई आर्थिक सहयोग गरेको छ।
त्यसैगरी पाल्पाको दमकडामा रहेका ३४ जना दृष्टिविहीन विद्यार्थीहरुको लागि अध्ययन सामाग्री, ड्रेस तथा सोलार गिजर प्रदान गरेको प्रवक्ता पन्थले जानकारी दिए । समुहमा बुटवलका विभिन्न क्याम्पसमा अध्ययनरत युवाहरु आवद्ध रहेका छन् ।
