यहाँका एकसय ३५ वादी परिवारको घरबास निर्माण हुने भएको छ। लामो समयदेखि सार्वजनिक ठाउँमा बस्दै आएका वादी परिवारलाई सहरी विकास मन्त्रालयको आर्थिक सहयोगमा यस आवमा एकसय ३५ घरपरिवारका लागि घरबास निर्माण हुन लागेको हो।
गत माघ २० गते ‘रुकुमका वादी परिवार घरबासविहीन’ शीर्षकको समाचार प्रकाशन भएपछि मन्त्रालयले जनता आवास कार्यक्रममार्फत घर निर्माण गर्न लागेको हो। आफ्नो घर र घर बनाउनका लागि जमिन नहुँदा लामो समयदेखि यहाँका वादी समुदाय खोलाका छेउमा र सार्वजनिक ठाउँमा बस्दै आएका थिए।
घर निर्माणका लागि जमिन नभएका साबिकको पिपल गाविसका ११ घर वादी परिवारलाई सांसद गणेशमान पुनले संसद विकास कोषको रकमबाट एकसय वर्गमिटर जमिन खरिद गरिदिएका छन्। आफ्नो नाममा लालपुर्जा र घर सँगै पाएपछि वादी परिवार निकै खुसी भएका छन् । विगत ४० वर्षदेखि सार्वजनिक ठाउँमा बनाएको सानो छाप्रोमा बस्दै आएको पिपलका मनबहादुर वादीले लालपुर्जा र घर पाउने भएपछि निकै खुसी भएको बताए।
सानो भए पनि आफ्नो घरबास निर्माण हुने भएपछि वादी परिवार एउटा समस्याको समाधान भएको रुघा–२ का गोपाल वादीको भनाइ छ । आर्थिक अवस्था कमजोर भएका कारण वादी परिवारले आफ्नो घरजग्गा बनाउन नसकेको वादी समुदायका अगुवाको भनाइ छ ।
जिल्लाका आठविसकोट, आठविसडाँडागाउँ, रुघा, पिपल, चौरजहारी नगरपालिकालगायत ठाउँमा वादी परिवारको बसोबास रहेको छ । दुईसय आठ घरधुरी रहेको वादी परिवारमा आठसय १६ जनसङ्ख्या रहेको छ । रासस
