विभिन्न बैंकहरुको धितोमा रहेको जग्गा देखाइ बैना उठाइ ठगी गरेको भन्दै जिल्ला प्रशासन कार्यालय ललितपुरमा एनबि समूहका जितबहादुर श्रेष्ठ र लक्ष्मीबहादुर श्रेष्ठ विरुद्ध उजुरी परेको छ।
हरिसिद्धि इटा टायल कारखानाको नाममा रहेको जग्गा अहिले नेपाल बंगलादेश बैंक र एनसिसि बैंकमा धितोमा रहेको र श्रेष्ठ दाजुभाइले केशव तिमल्सिना भन्ने व्यक्तिबाट सो जग्गा देखाइ १० करोड बैना लिएको भन्दै सिडिओ कार्यालयमा उजुरी परेको हो।
हरिसिद्धि इटा तथा टायल कारखाना लिमिटेड, सर्घष समितिका संयोजक अच्युत प्रसाद मिश्र तथा सेयरधनीहरुले दिएको उजुरीमा श्रेष्ठ दाजुभाइले कारखानाको जग्गा देखाएर करोडौं ठगी गरी सो कारखाना बन्द गर्ने अवस्थामा पुर्याएको उल्लेख छ।
बैनावापत १०करोड उठाइ गुडविल फाइनान्समा खाता खोली ४ करोड लक्ष्मीबहादुर श्रेष्ठले लिएको खुल्न आएको मिश्रले बताए। कम्पनीको १३ वर्षदेखि साधारणसभा हुन नसकेको, कम्पनीको कर पनि चुक्ता नगरेको अवस्थामा अनियमित तरिकाबाट खाता खोली रकम जम्मा गरी अपचलन गरेको सेयर सदस्यहरुले बताएका छन्।
हरिसिद्धि इटा तथा टायल कारखानाको हाल ४ सय रोपनी जग्गा छ। ती जग्गा नबिल लगायतका बैंकमा धितो छ। बैंकहरुबाट रकम लिदैँ नगरेपछि श्रेष्ठ दाजुभाइ बैंकिङ कसुर मुद्दामा ३ वर्ष फरारसमेत भएका थिए।