लन्डनको वेस्टमिन्स्टर पुलमा भएको दुर्घटनाका घाइते उद्धार गरिँदै । तस्बिर: न्यू योर्क टाइम्स
बेलायतको लन्डनमा बुधबार दिउँसो संसद भवनअगाडि एक प्रहरी अधिकारीमाथि हमला भएको छ।
हमलाकर्ताले संसद भवनको सुरक्षामा खटिएका प्रहरी अधिकृतलाई चक्कु प्रहार गरेका थिए। उनलाई बचाउन आएका अन्य प्रहरीले ती आक्रमणकर्तालाई गोली हानेका छन्।
यता प्रहरीमाथि चक्कु प्रहार भएको बेला संसद भवन अगाडिको वेस्टमिन्स्टर ब्रिजमा अर्को घटना भएको छ। एक कार चालकले अन्धाधुन्ध गाडी हाँकेर पाँच जनालाई घाइते बनाएका छन्। घाइते भएकी महिलाको उपचार क्रममा मृत्यु भएको छ।
यी दुवै घटना एकअर्कासँग जोडिएका छन् कि छैनन् भन्ने अहिल्यै यकिन भएको छैन। तर, लन्डन प्रहरीले यी दुवै घटनालाई ‘आतंकवादी’ हमलाका रूपमा लिएको छ। यही कारणले संसद भवनमा भएको घटनालगत्तै लन्डनको मेट्रो सेवा र सार्वजनिक बस सेवा तुरुन्तै बन्द गरिएको थियो।
