राजधानीको दरबारमार्गस्थित एक मदिरा पसलका सञ्चालकलाई केही दिनअघि नेपाल इन्भेस्टमेन्ट बैंकबाट फोन आयो। बैंकका कर्मचारीले भने, ‘तपाईंको खातामा ४ लाख रुपैयाँ अवैध तरिकाबाट जम्मा भएको देखिन आएको छ, कृपया बैंकमा सम्पर्क राख्नुहोला।’
बैंकले त्यसपछि उनको अकाउन्ट रोक्का गरेर रकम निकाल्न नमिल्ने बनाइदियो। मदिरा पसलका मालिक त्यसपछि महानगरीय अपराध महाशाखा पुगेर घटनाक्रम बताए। प्रहरीमा उजुरी पनि दर्ता गराए।
प्रहरीको निम्ति यो अनौठो घटना थियो।
यसअघि एटिएम सेन्टरहरूमा नक्कली कार्ड प्रयोग गरेर ह्याकरहरूले पैसा चोरी गरेको प्रहरीलाई थाहा थियो। डिपार्टमेन्ट स्टोर तथा रेस्टुरेन्टमा डेबिट वा क्रेडिट कार्ड घोट्ने स्वाइप मेसिन प्रयोग गरेर लाखौं ठगी भएको उजुरी पनि प्रहरीकहाँ आएको थियो। तर, यसरी कसैको खातामा अवैध रूपले रकम जम्मा भएको रिपोर्ट प्रहरीकहाँ कहिल्यै आएको थिएन।
अनुसन्धान गर्दै जाँदा प्रहरीले के पत्ता लगायो भने उक्त चार लाख रुपैयाँ अमेरिकी नागरिक ल्यारी इडवार्डको नाममा रहेको क्रेडिट कार्डबाट ती मदिरा सञ्चालकको खातामा जम्मा हुन आएको रहेछ।
अर्काको डेबिट तथा क्रेडिट कार्डको डाटा चोरेर रकम ठगी गर्ने गिरोहका आठ जनालाई महाशाखाको टोलीले पक्राउ गरेको छ। उक्त गिरोहले स्वाइप मेसिन प्रयोग गरेर ३ करोड २५ लाख रुपैयाँभन्दा बढी ठगी गरेको महाशाखाले जनाएको छ। पक्राउ पर्नेमा २ जना भारतीय नागरिक पनि छन्।
यो ठगीकाण्डमा मुख्य योजनाकार दोलखा घर भई बुढानिलकण्ठ बस्ने सुरेश केसी, ललितपुर कुसुन्तीका केवलप्रताप जबरा, क्षेत्रपाटीका अनुज नकर्मी, रोमन महर्जन, काभ्रेका विजय लामा, भारत नयाँदिल्ली घर भई क्षेत्रपाटी बस्ने नदिम खान र लखनउ घर भई बानेश्वर बस्ने आइटी इन्जिनियर अभिषेक पाण्डे पत्राउ परेका हुन्। जबरा यसअघि बैंकिङ कसुरमा जेल परेर छुटिसकेका व्यक्ति हुन्।
कसरी गरे उनीहरूले ठगी?
दुई वर्षअघि उनीहरूले भारतबाट ५० हजार भारु तिरेर म्याग्नेटिक स्ट्रिप कार्ड रिडर र राइटर डिभाइस नामक मेसिन किनेर ल्याए। त्यो मेसिनले जुनसुकै एटिएम कार्डको डाटा चोरी गर्छ। खाली कार्ड त्यसमा हालेर चोरी भएको डाटा सेभ गर्न सकिने एसएसपी दिनेश अमात्यले बताए।
उक्त म्याग्नेटिक स्ट्रिप कार्ड रिडर मेसिन किन्दा १५ वटा एटिएमजस्तै खाली कार्ड सित्तैमा पाइन्छ। म्याग्नेटिक स्ट्रिप कार्ड रिडर ल्यापटपमा जोडेपछि इन्टरनेटकोे सहायताले उनीहरू अनलाइनमा रहेका ब्रोकरहरुसँग सम्पर्क गर्छन्।
यो गिरोहले अहिलेसम्म नयाँदिल्लीको चारवटा कपडा पसलबाट ३ लाख भारु, दुई वर्षअघि पोखराको टिका रिर्सोटबाट २ करोड निकालेको एसएसपी अमात्यले बताए।
त्यस्तै, एक वर्षअघि क्षेत्रपाटीबाट ३० लाख, नौ महिनाअघि चावहिलको चाँदनी ज्वेलर्सबाट ४७ लाख, तीन महिनाअघि भक्तपुरको थान्का पसलबाट ४५ लाख र दरबारमार्गको दक्षिणतर्फ रहेको क्लिक्वायर सपबाट ४ लाख निकाल्न भ्याएको एसएसपी अमात्यले जानकारी दिए।
उनीहरुले स्वाइस मेसिन घरमै राखेर एटिएम कार्ड घोटी लाखौं रकम निकाल्ने गरेको महाशाखाका डिएसपी अजय केसीले सेतोपाटीलाई बताए।
केसीका अनुसार उनीहरुले ब्यापारीहरुलाई आर्थिक प्रलोभन देखाएर रकम ठगी गर्ने गरेका थिए। व्यापारीहरूलाई स्वाइस मेसिनमार्फत् जम्मा भएको रकममध्ये ६० प्रतिशतसम्म उनीहरुले दिने गरेको उनले बताए।
