ब्यवसायी अपहरण गरी फिरौती मागेका २ जना नेपाल प्रहरीका सइसहित ४ जनालाई प्रहरीले पक्राउ गरेको छ।
महानगरीय अपराध महाशाखाको टोलीले अपराध महाशाखामा नै कार्यरत सइ सम्बत तामाङ र गौशाला प्रहरीका सइ सुर्य लामासहित थप २ जनालाई पक्राउ गरेको हो। राजुकमार गुरुङ र अर्पणकुमार लामासँग मिलेर उनीहरुले गत माघ १ गते कोटेश्वरबाट म्यानपावर ब्यवसायी बद्री राइको अपहरण गरेका थिए।
उनीहरुले राइसँग २५-२५ लाखको ४ वटा चेक लिएका थिए भने २५ लाखको तमसुक बनाएका थिए। अनुसन्धानका क्रममा प्रहरीको समेत सम्लग्नता देखिएपछि उनीहरुलाई पक्राउ गरेर शरिर बन्धकको मुद्दा चलाईएको अपराध महाशाखाका एसएसपी दिनेश अमात्यले सेतोपाटीलाई बताए। गुरुङ र लामाले दसई जना प्रहरी साथमा लिएर राईको अपरहण गरेका थिए।
सइलाई आर्थिक प्रलोभनमा पारेको अनुसन्धानबाट खुल्न आएको छ। महाशाखाको कार्यभार सम्हाल्न माघ २४ गते एसएसपी अमात्य आएपछि अपहरणको केशका लागि उनले मातहतको पिल्लरलाई निर्देशन दिएका थिए। 'अनुसन्धान गर्दै जादाँ आफ्नै महाशाखाका सईको समेत मिलेमतो देखियो,' एसएसपी अमात्यले भने, 'अपराध गर्नेले सजायँ पाउनै पर्छ।'