ऐन कार्यान्वयनको माग राखी स्वास्थ्यकर्मी आन्दोलनमा उत्रेपछि महोत्तरीमा पोलियो खोप खुवाइने अभियान सुरु हुन सकेन। महोत्तरीमा शनिबार र आइतबार पोलियो थोपा खुवाउने कार्यक्रम थियो। स्वास्थ्यकर्मीको आन्दोलनका कारण पोलियो खोप अभियानका लागि चाहिने सामग्री खोप केन्द्रमा पठाउन नसकिएकाले शहरी तथा ग्रामीण क्षेत्रका १ लाख १० हजार बालबालिका खोपबाट वञ्चित भएका छन्।
स्वास्थ्यकर्मी सदरमुकाम जलेश्वरस्थित जिल्ला स्वास्थ्य तथा जनस्वास्थ्य कार्यालयमा धर्नामा बसेका छन्। जिल्ला अस्पताल, प्राथमिक, स्वास्थ्य केन्द्र तथा स्वास्थ्य चौकीमा सेवा ठप्प छ । छिमेकी देश भारतमा पोलियो उन्मूलन भइनसकेको अवस्थामा यो रोगको सङ्क्रमण नेपालको तराईको जिल्लामा फैलनसक्ने भन्दै स्वास्थ्य मन्त्रालयले महोत्तरीसहित मुलुकका १५ जिल्लामा यो कार्यक्रम सञ्चालन गर्न लागेको हो।
धर्नाले जिल्ला स्वास्थ्य तथा जनस्वास्थ्य कार्यालयका कामसमेत प्रभावित भएका छन्। बालबालिकालाई लगाइने नियमित खोप, तथ्यांक संकलन, जिल्ला तथा केन्द्रबाट सञ्चालित तालिम, गोष्ठीलगायत कार्यक्रम हुन सकेका छैनन्। स्वास्थ्यकर्मीको आन्दोलनका कारण अभियानमा असर पर्नसक्ने भन्दै अर्को सूचना जारी नभएसम्मका लागि पोलियो खोप कार्यक्रम स्थागित गरिएको जिल्ला जनस्वास्थ्य कार्यालय महोत्तरीले जनाएको छ।
खोप तथा पोलीयो थोपाबाट वञ्चित भएका दुधे बालबालिकाको स्वास्थ्यमा दिर्घकालीन असर पर्ने चिकित्सकहरु बताउँछन्। धर्नाका कारण कार्यक्रमअन्तर्गत महोत्तरीमा पाँच वर्ष मुनिका १ लाख १० हजार बालबालिका खोप कार्यक्रमबाट बन्चित भएका छन्। धर्नाका कारण महोत्तरी जिल्ला अस्पताल जलेश्वर तथा बर्दिवास अस्पतालसहित ५ वटा प्राथमिक स्वास्थ्य केन्द्र, ६८ स्वास्थ्य चौकी, र जलेश्वरमा रहेको सहरी क्लिनिकमासमेत बालबालिकालाई दिईने खोप कार्यक्रम हुन नसकेको जिल्ला जनस्वास्थ्य कार्यालय महोत्तरीले जनाएको छ ।
अभियानअन्तर्गत शनिबार खोप केन्द्रबाट बालबालिकालाई खोप खुवाइने र आज आईतबार २२ गते छुटेका बालबालिकालाई घरदैलोमै पुगेर खोप खुवाइने कार्यक्रम तय गरिएको थियो ।
