केही महिना अगाडि सेनाको जागिर छाडेर गोरखा ताप्ले २ का शिवहादुर वानियाँ काठमाडौंमा बसिरहेका थिए। आफूले जागिर छाडेपछि उनले गाउँकै सेनामा भएको साथी अशोक बानियाँलाई पनि जागिर छोड्न आग्रह गरे।
कोरियाबाट काठमाडौं आएका गोरखा ताप्लेकै नारायण बानियाँसँग उनीहरुको भेट भयो। बानियाँ हुन्डि कारोगारीसमेत हुन्। पछि उनीहरुले गोरखा घर भइ सामाुखुसी बस्दै आएका सुदिप थापामगर, रूकुम घर भइ मनमैजु बस्दै आएका विश्वास घर्तीमगर र धनकुमार परियारलाई साथमा लिए।
साथीभाइबाट चिनजान भएका स्याङजा घर भइ काठमाडौं बस्दै आएका प्रेमनारायण खरालसँग विभिन्न व्यक्तिले चेक दिएको र चेक साटेपछि लुट्ने योजना उनीहरुले बनाए। यही फागुन ११ गते खराल भतिज विधानलाई लिएर चेक साट्न न्युरोडस्थित ग्लोबल आइएमइ बैंकमा गए। उनीसँग भएका ४ वटा चेकमध्येको ३ लाख ६० हजार मात्र बैंकले साट्यो।
रकम लिएर उनीहरु बाहिर मात्र के निस्केका थिए, २ जना अशोक र नारायणले हामी प्रहरी हो, अनुसन्धानका लागि हिँड्नुस भन्दै आग्रह गरे। त्यसपछि उनीहरुले शोभाभगवतीसम्म उनीहरुलाई लगभग २० मिनेटजति हिँडाए। ट्याक्सी चढाएर बसुन्धरा लगे ।
ट्याक्सीमा हिड्दैँ गर्दा नारायणले मोबाइल फोन निकाले। 'एसएसपी साव हामीले नियन्त्रणमा लियौं, लेराउँदैं छौं' भनेर उजुरी गरे। नक्कली एसएसपी बनेका सुदिपले 'हुन्छ छिटो गर' भनेर निर्देशन दिएका थिए।
सुदिप अपराध महाशाखाको नक्कली एसएसपी दिनेश अमात्य बनेर लुटपाटमा संलग्न भएको प्रहरीले जनाएको छ। त्यहाँ अरु ४ जना जम्मा भए। बैंकबाट साटेको र पर्समा रहेको ४ लाख २७ हजार लिएर उनीहरु भागे। लुटिएपछि प्रहरीलाई उजुरी दिएको २४ घन्टाभित्रै ६ जना रकमसहित पक्राउ परे। ६ जनालाई आज महानगरीय प्रहरी अपराध महाशाखाले पत्रकार सम्मेलन गरेर सार्वजनिक गरेको छ।
लुटपाटको मुख्य योजनाकार नारायण बानियाँ र विश्वास घर्ती भएको एसएसपी दिनेश अमात्यले बताए। उनीहरुले लुटेको रकम भागबन्डा गरेका थिए। नारायण र विश्वासले ९७/९७ हजार लिएका थिए भने अरुलाई ५०-५० हजार बाँडेका थिए।
सेनाको जागिर छाडेका शिवबहादुर गत वर्ष काठमाडौंमा भएको सार्क शिखर सम्मेलनमा भिभिआइपीको सुरक्षार्थमा खटेका थिए।
