भक्तपुरको दुवाकोटमा वीर अस्पतालले बिस्तार गर्न लागेको एक हजार बेडको अस्पतालका लागि चीनको सरकारी कम्पनी इच्छुक देखिएको छ।
उक्त अस्पताल बनाउन सीएमसी नामक चिनीयाँ कम्पनी इच्छुक भएपछि स्वास्थ्य मन्त्रालयले प्रक्रिया अघि बढाउने तयारी गरेको स्वास्थ्यमन्त्री गगन थापाले सेतोपाटीलाई बताए।
उक्त अस्पताल बनाउन सबै काम सीएमसी कम्पनीलाई जिम्मा दिने गरी मन्त्रालयले अर्थ मन्त्रालयमा प्रस्ताव पठाउँदै छ। यस प्रस्तावमा अर्थ मन्त्रालयसमेत सकारात्मक पाएको मन्त्री थापाले बताए। ‘शैय्या बनाउन इच्छुक चिनीयाँ कम्पनीलाई नै अस्पतालको सम्पूर्ण जिम्मेवारी दिने तयारीस्वरूप मन्त्रालयले फाइल अर्थमा पठाउँछ,’ थापाले भने,‘ अर्थ मन्त्रालय पनि यस विषयमा सकारात्मक छ।’
अस्पताल बनाउँदा अनुदान र ऋण लगायतका विषयमा अर्थमन्त्रालय र सरकारले नै चिनियाँ सरकारसँग सम्झौता गर्नेछ।
भूकम्पले वीर अस्पताल क्षतिग्रस्त भएपछि अघिल्लो सरकारले नै भक्तपुरको दुवाकोटमा एक हजार बेडको वीर अस्पताल विस्तार गर्ने घोषणा गरेको थियो। उक्त घोषणा अनुसार सरकारले जग्गा समेत लिइसकेको छ।
अहिले वीर अस्पताल भएको ठाउँ काठमाडौंमा सय बेडको अस्पताल जापानिज सरकारको सहयोगमा बनिरहेको छ। वीर अस्पतालको डाक्टर क्वाटर छेउकै जग्गामा थप सात सय बेडको भवन निर्माणका लागि स्वास्थ्य मन्त्रालयले अर्थ मन्त्रालयमा प्रस्ताव पेश गर्दै छ।
राष्ट्रिय चिकित्सा विज्ञान प्रतिष्ठान (न्याम्स) कै भवन बनाउने र त्यस अन्तर्गतको वीर अस्पताललाई विस्तार गरेर दुवाकोटमा हजार बेडको भवन बनाउने योजना पनि मन्त्रालयले सँगै बनाइरहेको थियो।
जग्गा, सरकारी योजना सबै हेरेपछि चाइनिज कम्पनी अस्पताल बनाउन इच्छुक देखिएको मन्त्री थापाले बताए।
मन्त्रालयले पनि उक्त कम्पनीबारे अध्ययन गरेर प्रारम्भिक छलफल गरेको हो। दुवै सकारात्मक भएपछि मन्त्रालयले अर्थ मन्त्रालयमा थप प्रक्रियाको लागि प्रस्ताव पठाउँदै छ।