उपप्रधानमन्त्री तथा गृहमन्त्री बिमलेन्द्र निधिले तीन दिनदेखि त्रिशुली नदीमा बेपत्ता पूर्वगृहमन्त्री माधव घिमिरे र उनका भाइको खोजीका लागि बंगलादेशबाट गोताखोर झिकाउन आवश्यक नरहेको बताएका छन्।
मंगलबार अपरान्ह गृहसचिव लोकदर्शन रेग्मी र सुरक्षा प्रमुखलाई साथ लिएर दुर्घटनास्थल चितवनको दारेचोकस्थित घोप्टेभीरको निरीक्षण गर्न पुगेका उपप्रधानमन्त्री तथा गृहमन्त्री निधिले बंगलादेशीभन्दा नेपाली गोताखोर नै सक्षम रहेको बताए। उनले पोखराबाट दुईवटा सोनार झिकाएर खोजी गर्ने कामलाई सरकारले तीव्रता दिएको भन्दै आवश्यक परे विदेशबाट अत्याधुनिक उपकरण भने मगाइने बताए।
पूर्वगृहमन्त्री घिमिरे र उनका भाइसहित सातजना चढेको जीप गत आइतबार साँझ घोप्टेभीरबाट त्रिशुली नदीमा खसेको थियो। जीप दुर्घटनामा परी घाइते भएका चालक विष्णु राईलाई नेपाली सेनाको हेलिकप्टरमा काठमाडौं ल्याइएको छ।
तस्बिरः नारायण न्यौपाने