पूर्वगृहमन्त्री तथा मुख्यसचिव माधवप्रसाद घिमिरे चढेको जीप त्रिशुली नदीमा बेपत्ता हुँदा उनीसँगै सहोदर दुई भाइहरू पनि बेपत्ता रहेको थाहा भएको छ। घिमिरेसहित उनका दुई भाइ मोहन र प्रकाश पनि बेपत्ता रहेको चितवनका प्रमुख जिल्ला अधिकारी विनोदप्रकाश सिंहले सेतोपाटीलाई बताए।
घिमिरेकी ८० वर्षीया आमा चैतन्यकुमारी, आफन्त नारायण काफ्ले र सशस्त्र प्रहरीका सई रामचन्द्र कार्कीको शव भेटिएको छ। चालक विष्णु राई हाम फालेर बाँचेका छन्। घाइते राईको उपचार भइरहेको प्रहरीले जनाएको छ।
प्रहरीका अनुसार घिमिरे परिवार मुक्तिनाथ दर्शन गरेर काठमाडौं फर्किँदै थियो। उनीहरू चढेको बा ९ च १५३१ नम्बरको निजी गाडी आइतबार अपराह्न मुग्लिन र कुरिनटार बीचको घोप्टेभीरबाट त्रिशुली नदीमा खसेको थियो।
बेपत्ताहरुको खोजी कार्य जारी रहेको चितवनका प्रहरी उपरीक्षक वसन्त कुँवरले बताए। नेपाल प्रहरी, सशस्त्र प्रहरी र नेपाली सेनाको टोली खोजीका लागि खटिएको छ।
