खादाको प्रयोगका सम्बन्धमा संस्कृति पर्यटन तथा नागरिक उड्डयन मन्त्रालयले यसअघिको निर्णय तत्काल कार्यान्वयन नगर्ने भएको छ।
खादासँग आफ्नो धार्मिक आस्था जोडिएको भन्दै मंगलबार नेपाल आदिवासी जनजाति महासंघमा आवद्ध संघ-संस्थाहरुले संस्कृति पर्यटन तथा नागरिक उड्डयन मन्त्री जीवनबहादुर शाहीसँग कुरा गरेपछि मन्त्री शाहीले खादासम्बन्धी यसअघिको निर्णय तत्काल कार्यान्वयन नगर्न निर्देशन दिएका हुन्।
मन्त्रालयका प्रवक्ता सहसचिव घनश्याम उपाध्यायले यसअघि पनि वातावरण मैत्री र स्वदेशी उत्पादनलाई प्रोत्साहन दिने निर्णय भएको उल्लेख गर्दै धार्मिक आस्थामा असर परेको गुनासो आएपछि त्यो निर्णय तत्काल कार्यान्वयन नगर्न सम्बन्धित निकायलाई पत्र पठाइएको बताए। उनले सबै पक्षसँग छलफल गरेर मात्रै खादाको प्रयोगबारे निर्णय लिइने बताए।
दुई महिनाअघि मन्त्रालयले सचिवस्तरीय निर्णय गरेर विदेशी र वातावरण अमैत्री खादा प्रयोग नगर्ने निर्णय गरेको थियो।
