एनआरएन मलेसियाका पूर्व अध्यक्ष महेन्द्रजंग शाही सहित २ जना नेपालीलाई मलेसियन प्रहरीले पक्राउ गरेको छ ।
नक्कली भिसा बनाएर दर्जनौ व्यक्तिहरुलाई ठगी गरेको भन्दै मलेसिया प्रहरीको स्पेसल टाक्स फोर्सले शाहीसहित हिमालयन रेष्टुरेन्टका संचालक टेकबहादुर राना र देवी गुरुङलाई पक्राउ गरेको हो । मलेसियामा रहेको नेपाली राजदूत ले पनि शाही पक्राउ परेको पुष्टि गरेका छन् ।
मलेसियाबाट फर्कने क्रममा एक दर्जनभन्दा बढी युवाहरु त्रिभुवन विमानस्थलमा पक्राउ परेपछि उनीहरुले शाहीले नक्कली एमआरपी बनाइदिएको बताएका थिए । त्यसपछि नेपाल प्रहरीले मलेसियन प्रहरी र दूतावासलाई पत्र पठाउँदै उनलाई पक्राउ गर्न भनेको थियो ।
शाही पक्राउ परेपछि एनआरएन मलेसियाका केही पदाधिकारी तथा सदस्यहरु पनि दूतावास र मलेसियन प्रहरीको निगरानीमा छन् । एनआरएनको खोल ओढेर नेपाली ठग्नेहरुविरुद्ध पछिल्लो समय दूतावास सक्रिय रहेको ब्यापारी हरि भट्टराईले बताए।
