तस्बिर सौजन्यः एभिन्यूज टिभी
गौरबाट पोखरा जाँदै गरेको एउटा यात्रुबाहक बस त्रिशूलीमा दुर्घटना हुँदा २१ जनाको मृत्यु भएको छ।
ग१ख ३७०९ नम्बरको बस मुग्लिनको कालीखोला क्षेत्रबाट त्रिशूली नदीमा खसेको चितवन प्रहरीले जानकारी दिएको छ।
घटनास्थलमा रहेका एसपी बसन्त कुँवरका अनुसार २० जनाको शव बाहिर निकालिएको छ। एक जना घाइतेको चितवन मेडिकल कलेजमा उपचारका क्रममा मृत्यु भएको कुँवरले जानकारी दिए।
कुँवरका अनुसार दुर्घटनामा अन्य १६ जना घाइते फेला परेका छन्। घाइते सबैलाई उपचारका निम्ति पठाइसकिएको छ।
मुग्लिनबाट नारायणघाटतर्फ चन्डीभन्ज्याङ गाविसको कालीखोलामा झन्डै सय मिटर तल नदीमा बस खसेको मध्यक्षेत्रीय ट्राफिक प्रहरी कार्यालयले जानकारी दिएको छ।
बिहान ४ बजे गस्तीमा निस्किएको बेलामा प्रहरी टोलीले नदीमा तैरिरहेको बस देखिएको थियो।
स्थानीयबासी प्रहरी र सशस्त्र प्रहरीले उद्धार गरी घाइतेलाई अस्पताल पठाउने काम भइरहेको छ। बसको केही भागमात्र नदीबाहिर देखिएको थियो।।
