काठमाडौं महानगरपालिका–१४ बल्खुस्थित दक्षिणकाली पेट्रोल पम्पको कार्यालय कोठामा बुधबार आगलागी हुँदा एक प्रहरी हवल्दारसहित तीन जना घाइते भएका छन्।
त्यस्तै कम्प्युटर र फर्निचर जलेर करिब ७० हजार रुपैयाँ बराबरको धनमाल क्षति भएको छ ।
आगो निभाउने क्रममा पम्पमा कार्यरत कीर्तिपुर–७ गाप्चाका ४० वर्षीय शिव महर्जन, महानगरीय प्रहरी वृत्त कालीमाटीमा कार्यरत प्रहरी हवल्दार शंकरदत्त भट्ट र लु.१ ख ९५५३ नम्बरको नेपाल आयल निगमको ट्याङ्कर चालक रुपन्देही पर्सौनी–१ भैरहवाका ३५ वर्षीय विकाश गुरुङ जलेर घाइते भएका हुन् ।
महर्जन र प्रहरी हवल्दार भट्टलाई उपचारको लागि बयोधा अस्पताल बल्खु लगेकोमा भट्ट उपचार पश्चात् डिस्चार्ज भइसकेका छन्।
अर्का घाइते गुरुङको कीर्तिपुर अस्पतालमा उपचार भइरहेको र अवस्था गम्भीर रहेको प्रहरीले जनाएको छ।