दुर्घटना न्यूनीकरण गर्ने विषयमा बहस चलिरहेका बेला क्षमताभन्दा बढी यात्रु बोक्ने गाडी ट्राफिकले छाडिदिँदा भक्तपुरमा जन्तीबस दुर्घटनामा परेको छ। भक्तपुरमा बिहीबार जन्तीबस पल्टिँदा ४८ जना घाइते भएका छन्।
बा४ख १९०५ नम्बरको बस नगरकोट–४ जीतपुरमा सडकबाट २५ मिटर तल खसेको थियो। भक्तपुर प्रहरी प्रमुख एसपी किरण बज्राचार्जका अनुसार ३२ सिट क्षमताको गाडीमा ४८ यात्रु रहेको बुझिएको छ। घाइते ४८ मध्ये अहिले २५ जना अस्पतालमा उपचार भइरहेको छ।
२५ जना भक्तपुर र २ जनाको जोरपाटी अस्पतालमा उपचार भइरहेको छ। ‘अधिकांश हातखुट्टा भाँचिएको छ,’ बज्राचार्यले भनिन्, ‘बाँकी रहेका साधारण उपचारपछि घर फर्केका छन्।’
एसपी किरणका अनुसार जीतपुरबाट जन्ती बोकेर बस कोटेश्वरतर्फ अाउँदै थियो। लिन अाएका तीन वटा गाडीमध्ये उक्त गाडी बढी यात्रुका कारण दुर्घटना भएको हो।
साधारणतया जन्ती बसमा बढी चढाइने गर्दा यस्तो दुर्घटना हुने गरेको प्रहरीको भनाइ छ। महानगरीय ट्राफिक महाशाखाले भक्तपुरको जन्तीबस दुर्घटनाबारे अनभिज्ञता जनाएको छ। ‘भक्तपुरमा दुर्घटना भएको हो वा हैन हामीलाई जानकारी छैन,’ महाशाखा प्रवक्ता एसपी लोकेन्द्रबहादुर मल्लले सेतोपाटीसँग भने।
तस्बिरः रमेश गिरी, रासस
