प्रसुति अस्पतालमा भर्ना हुनेमध्ये ८ प्रतिशत महिलाले गर्भपतन गराउने गरेको देखिएको छ ।
नेपालकै एक मात्र परोपकार प्रसुति तथा स्त्रीरोग अस्पतालको तथ्यांक अनुसार भर्ना भएकामध्ये ७ दशमलव ८५ प्रतिशत महिलाले गर्भपतन गराउने गरेका छन्।
गत वर्ष २३ हजार ५ सय ४७ जना महिला भर्ना भएकामा १ हजार ८ सय ४९ जनाले गर्भपतन गराएका थिए। अस्पतालले आफ्नो ५७ औं वार्षिकोत्सवका अवसरमा बिहीबार गरेको कार्यक्रममा सार्वजनिक गरिएको तथ्यांक अनुसार गर्भपतन गराउनेको दर दुई वर्षमा एउटै देखिएको छ।
अघिल्लो वर्ष १ हजार ८ सय ४५ जनाले गर्भपतन गराएका थिए। अस्पतालले १२ वर्षदेखि गर्भपतन सेवा उपलब्ध गराउँदै आएको छ। अस्पतालले अघिल्ला वर्षको तुलनामा गर्भपतन गराउने संख्यामा कमी आएको बताएको छ। आर्थिक वर्ष २०६९÷०७० मा २ हजार १ सय १८ तथा ०७०÷०७१ मा २ हजार १० जनाले गर्भपतन गराएका थिए।
प्रसूति अस्पतालले एक वर्षमा १८ हजार ९७ जनालाई सुत्केरी गराएको छ। अस्पतालले गत आर्थिक वर्ष १ लाख ६० हजार महिलालाई स्वास्थ्य सेवा उपलब्ध गराएकामा त्यसमध्ये १८ हजार ९७ जनालाई सुत्केरी गराएको हो।
