म्याग्दीको रुम गाविस ६ बेली र जेम गाउँका बासिन्दाले गोठका पशु चौपाया बेचेर लघुजलविद्युत परियोजना निर्माण गरेका छन् । करिब तीन वर्षको प्रयासमा रुमको बेलीमा छेरवाङखोला लघुजलविद्युत परियोजना निर्माण गरेका स्थानीयबासीको विगतको दुखलाई अहिले बिजुलीको उज्यालोले बिर्साएको छ।
बि.स २०६८ सालदेखि निर्माण सुरु भएको ११ किलोवाट क्षमत्ताको परियोजनाबाट साउन महिनाको अन्तिम सातादेखि नियमित विद्युत उत्पादन सुरु भएको छ । परियोजना निर्माणका लागि एक सय ५० दिन श्रमदान गरेका खेती किसानी र पशुपालनबाट जिविकोपार्जन गर्दै आएका बेलीजेमबासीले गोरु, भैसी, भेडाबाख्रा, कुखुरा बिक्री गर्नुका साथै ऋण खोजेर भएपनि प्रतिघर १८ हजार रुपैयाका दरले लगानी गरेका उपभोक्ता समितिका सदस्य दुर्गे पुनले वताए ।
सरकारी निकायको अनुदानका साथै एक सय ४० घरधुरी उपभोक्ताबाट चन्दा संकलन र श्रमदान गरेर ५२ लाख ४८ हजार रुपैयाको लगानीमा निर्मित परियोजनाबाट विद्युत उत्पादन हुन थालेपछि गाउँ झिलीमिली बन्दा मट्टितेलको टुकी, ब्याट्रीबाट चल्ने टुकीमारा र दियालोको धिपधिपे उज्यालोबाट मुक्ति मिलेकोमा स्थानीयबासी हर्षित बनेका छन् ।
उपभोक्ता समितिका अनुसार प्रारम्भिक सर्वेक्षणमा ४२ लाख रुपैया लागत अनुमान गरिएपनि काठको पोलको विकल्पमा फलाम र निर्माणधिन अवस्थामा पहिरोले नहर भत्काउँदा १० लाख ४८ हजार रुपैया लागत बढेको हो । भौगोलिक बिकटता, निर्माण समयअवधि धेरै हुनु र उपभोक्ताबाट टिकाउका लागि फलामे पोलको माग भएका कारण लागत बढेपनि सरकारी अनुदान प्रारम्भिक सर्वेक्षण अनुसार प्राप्त हुँदा समितिलाई १२ लाख रुपैया ऋण लागेको छेरवाङखोला लद्युजलविद्युत परियोजना रुम उपभोक्ता समितिका अध्यक्ष नरबहादुर पुनले जानकारी दिए ।
परियोजना निर्माणका लागि वैकल्पीक उर्जा प्रर्वद्धन केन्द्रले प्रतिकिलोवाट एक लाख २५ हजार रुपैया अनुदान उपलब्ध गराउने निती अनुसार हालसम्म ५० प्रतिशत, जिल्ला विकास समितिले चार लाख २० हजार र रुम गाविस कार्यालयले दुई लाख १० हजार रुपैया सहयोग गरेका छन् ।
छेरवाङखोला सहित राष्ट्रिय प्रशारण लाईनको पहुँच नभएको म्याग्दीका दुरदराजका बस्तीमा उर्जा विकास कार्यक्रम मार्फत १६ वटा परियोजना निर्माण भएका जिविस अन्तरगतको ग्रामिण उर्जा तथा वातावरण ईकाईका अधिकृत रञ्जन अधिकारीले जानकारी वताए ।
विकासका लागि आधारभुत पुर्वाधार मानिने विद्युत सुबिधाका लागि भौगोलिक विकटता र गरिबीका बावजुद पनि गाउँलाई झलमल्ल पारेका बेलीजेमबासिले समुदायको ईच्छाशक्ति र एकता भएमा विकास सम्भव छ भन्ने सन्देश दिएका छन् ।
