म्याग्दीको नारच्याङ गाविसमा मात्रै दस वटा जलविद्युत आयोजना निर्माण चरणमा छन्। जिल्लाको उत्तरीय पर्यटकीय क्षेत्र र अन्नपूर्ण पदमार्गअन्तर्गत पर्ने जलस्रोतको अथाह भण्डार भएको नारच्याङ गाउँमा अहिलेसम्म साना–ठूला दस जलविद्युत आयोजना भित्रिएका छन ।
अहिले गाउँमा भित्रिएका जलविद्युत आयोजनामध्ये दुई जलविद्युत आयोजना निर्माण चरणमा प्रवेश गरेपछि नारच्याङ ‘हाइड्रो भिलेज’ मा परिणत भएको छ । अन्नपूर्ण साउथबाट बग्ने घलेम्दी, निलगिरि हिमालबाट बग्ने निलगिरि , मिरिस्ती र खयरवराह तालबाट बग्ने रेले खोलाबाट विद्युत उत्पादनका लागि अहिलेसम्म नारच्याङमा मात्रै ३ सय ८४ मेगावाट क्षमताको जलविद्युत आयोजना छन ।
नारच्याङमा विसं २०४३ मा निर्माण सुरु भएर २०४४ देखि विद्युत वितरण थालेको दुई मेगावाट क्षमताको तातोपानी जलविद्युत आयोजनाले जलविद्युतको सम्भावनाको ढोका खोलेको थियो । अहिले नारच्याङमा रोवस्ट्र्स इनर्जीको ४२ मेगावाट क्षमताको मिरिस्टीखोला र रेलिनार इनर्जी कम्पनीको चार मेगावाटको घलेम्दीखोला जलविद्युत आयोजना निर्माण चरणमा प्रवेश गरेको नारच्याङ जलसरोकार उपभोक्ता समितिका सदस्य तेज गुरुङले जानकारी दिए ।
गुरुङका अनुसार ३८ मेगावाटको निलगिरि, १० मेगावाटको घलेन्दी जलविद्युत आयोजनाले वातावरणीय प्रभाव मूल्याङ्कनको काम सकेको छ । त्यसैगरी ६ मेगावाटको रेलेखोला जलविद्युत आयोजनाले वातावरणीय प्रभाव मूल्याङ्कनको काम गरिरहेको छ । बैसठ्ठी मेगावाटको निलगिरि क्यासेट, पाँच मेगावाटको निलगिरि माथिल्लो र ५० मेगावाटको मध्य कालीगण्डकी जलविद्युत आयोजना अहिले दर्ता भएको नारच्याङ जलसरोकार उपभोक्ता समितिले जनाएको छ ।
