जब साँझ पर्न थाल्छ अनि लठ्ठी बोकेका महिलाहरू गाउँको गस्तिमा निस्कन्छन्। तुलसीपुर १९ हस्नापुरका तीन दर्जन बढी महिलाहरू गस्तिमा दिनहुँ निस्कन्छन्। हातमा टर्च र लठ्ठी बोकेर उनीहरू यसरी गाउँको एरियाभर रातभर गस्ति गर्न थालेको चार महिना पुग्यो।
महिलाहरूले मुख्यगरी भट्टी पसललाई निगरानी गर्छन्। मदिरा सेवन गरी ज्यादती गर्ने पुरुषलाई कारवाही गर्नु नै रात्री गस्तिको उद्देश्य हो। रातभर भट्टीमा बस्ने मनपरी बोल्दै हिँड्ने, पैसा जति मदिरा र जुवातासमा स्वाहा पार्ने, मध्यरातमा घरमा आएर श्रीमतीलाई कुट्ने क्रम बढ्न थालेपछि त्यसका विरुद्ध हस्नापुरका महिलाहरूले मोर्चा बन्दी गरेका हुन। जसको नेतृत्व स्थानीय आमा समूहकी अध्यक्ष भूमा कार्कीले गर्दै आएकी छन्।
मदिरा र जुवातासमा पुरुषहरू लिप्त हुँदै गएपछि उक्त ज्यादतीका विरुद्धमा उनीहरूले वैशाख २२ गते आमा समूह गठन गरी हातहातमा लाठी बोकेर गस्ती थालेका हुन। उनीहरूले यसबीचमा चारजनालाई कारबाही गरिसकेका छन्। उक्त कारबाहीमा उक्त गाउँका शिक्षक र आफूलाई प्रतिष्ठित ठान्ने व्यक्ति पनि परेका छन्। चारजनाको कारबाहीवाट दुई हजार रुपैयाँ संकलन भएको छ।
पहिलो पटकलाई चेतावनीसहित प्रतिव्यक्ति पाँच सय आर्थिक जरिवाना गरिएको छ। महिलाहरूको गस्तीपछि यहाँका मदिरा पसलसमेत साँझ ६ बजे नै बन्द हुन्छन्। त्यसले समाजको विकृति मात्रै रोकिएको छैन पुरुषहरू साँझमा घरमै बस्न थालेका छन्।
‘आमा समूहको गस्तीपछि गाउँमा मदिरा सेवन गरी होहल्ला गर्ने अनि समाजलाई आतंकित पार्नेहरूको संख्यामा मात्रै घटेको छैन जुवातास समेत घटेको छ’, तुलसीपुर १९का वडा सचिव मानबहादुर रावतले भने ‘हस्नापुर गाउँ कुलुतमा फस्दै थियो आशा छ अब महिलाको प्रयासले त्यसमा स्थानीयहरू कुलतबाट जोगिने छन्।’
