स्कुल नजिकैको पर्खाल भत्किएर शुक्रबार बिहान ललितपुर टौखेलको पुष्पाञ्जली बोर्डिङ स्कुलका दुई छात्राको ज्यान गएको छ भने दुई दर्जन विद्यार्थी घाइते भएका छन्। सबैले स्कुलको भन्दा पनि नजिकै आवश्यक मापदण्ड पुरा नगरी पर्खाल लगाएकाले घटना भएको भन्दै जग्गा प्लटिङ गर्नेको दोष भएको बताएका छन्। तर शुक्रबार साँझसम्म सो जग्गा प्लटिङ गर्ने मानिस को हुन् प्रशासनले पत्ता लगाउन सकेको छैन। ‘कर्मा लामा भन्ने मानिस हो भनेर हामीले उनको फोन ट्रयाप गरेका छौं’, ललितपुरका प्रमुख जिल्ला अधिकारी ऋषिराम शर्माले भने ‘तर मोबाइल स्वीच अफ छ, प्रहरीले अहिले पनि उनको खोजी गरिरहेको छ।’
शर्माले पर्खाल लगाउनमा जग्गावाल र स्कुलको के कति कमजोरी देखिन्छ अनुसन्धान गरेर पीडित विद्यार्थीका परिवारलाई क्षतिपूर्ति दिइने बताए। ‘हामी दुबै पक्षको अनुसन्धान गर्छौं, कुन मापदण्डमा पर्खाल बनाइएको रहेछ, मापदण्ड नपुगेको भए दोषीलाई कारबाही गर्छौं।’
यसैबीच शुक्रबार साँझ गृहमन्त्री शक्तिबहादुर बस्नेतले घटना भएको विद्यालयको निरीक्षण गरेका छन्।
