आमाबुबाको समेत पहिचान नभएका तीनजना पूर्व सडक बालकले नागरिकता पाएका हुन्। सडक बालबालिकाको पुनःस्थापन केन्द्र ‘हाम्रो घर’ ले पुनःस्थापन गरेका उनीहरुलाई चितवन प्रशासनले नागरिकता प्रदान गरेको हो।
यसरी नागरिकता पाउनेमा सुरज कँडेल, शङ्कर गिरी र रोशन खड्का रहेका छन्। उनीहरुलाई हाम्रो घरले किरण थर थप्ने गरेको छ। चितवनका प्रमुख जिल्ला अधिकारी विनोदप्रकाश सिंहले नागरिकता ऐन २०६३ अन्तर्गत दफा ३ को उपदफा ३ अनुसार नागरिकता दिएको बताए।
उक्त ऐनमा बाबुआमाको ठेगाना थाहा नभएको र नेपालभित्र भेटिएकालाई नागरिकता दिने व्यवस्था भएअनुसार त्यसैलाई टेकेर नागरिकता प्रदान गरिएको उनले बताए। प्रजिअ सिंहका अनुसार बाबुआमाको नाम खाली राखेर नागरिकता प्रदान गरिएको छ।
उनीहरुलाई सडकबाट उद्धार गरी पुनःस्थापन गरिएको हो। अहिले उनीहरु विभिन्न पेसामा आबद्ध भएका छन्। सुरज कालिका रेडियो र टिभीमा कार्यक्रम प्रस्तोताको रुपमा काम गर्छन्। हास्यव्यङ्ग्य कार्यक्रम चलाउँछन्। नागरिकता नहुँदा उनी धेरै कामबाट वञ्चित थिए। गाडी चलाउन जाने पनि लाइसेन्स बनाउन पाएका थिएनन्।
अन्य दुई जना इलेक्ट्रोनिक्स पेसामा आबद्ध छन्। 'बल्ल म नेपाली नागरिक भएँ, सुरजले खुसी हुँदै प्रतिक्रिया दिए, अब लाइसेन्स बनाउँछु, पासपोर्ट बनाउँछु, सबै काम गर्छु।' उनीहरुको पालनपोषणमा सक्रिय हुनुभएकी आमा गङ्गा सिग्देलले पुनःस्थापित बालबालिकाको हकमा एउटा नजिर स्थापना भएको भन्दै यसले हाम्रो घर परिवार नै खुसी भएको बताए।
उनीहरु तीनै जनालाई २०६२ सालमा सडकबाट ल्याएर हाम्रो घरमा राखिएको हो। २०६१ सालमा स्थापना भएको हाम्रो घरमा २०६२ सालदेखि बालक राख्न थालिएको थियो। हाम्रो घरमा बस्ने पहिलो सडक बालक नै सुरज कँडेल किरण रहेको सिग्देलले बताए।
हाम्रो घरले अहिलेसम्म ३९ जना सडक बालकलाई पुनःस्थापन गरिसकेको छ। हाल १९ जना मात्रै हाम्रो घरमा आश्रय लिएर बसिरहेका छन्। बाँकी आफन्त भेटिएका घर गइसकेका छन् भने घर नभेटिएका विभिन्न पेसामा लागेर आत्मनिर्भर भइसकेका छन्। रासस