नेपालले एक वर्षभित्रमा २० देशका ४१ जना विदेशी नागरिकलाई निष्कासन गरेको छ। अपराधिक क्रियाकलापमा संलग्न र ‘ओभर स्टे’हरुलाई निष्कासन गरेको अध्यागमन विभागका महानिर्देशक केदार न्यौपानेले जानकारी दिए।
निस्कासन हुनेमा युरोपलगायत खाडी मुलुकका छन्। सबैभन्दा बढी चीनका १० जना, अमेरिका र उज्बेकिस्तानका ४ जना, फिलिपिन्सका ३ जना, पाकिस्तान, क्यानाडा, दक्षिण कोरिया र बेलायतका दुई-दुई जनालाई निष्कासन गरिएको छ।
ताइवान, मेक्सिको, रुस, फिनल्याण्ड, डेनमार्क, लेबनान्, स्पेन, अष्ट्रेलिया, माली, नेदरल्याण्ड, साउदी अरेबिया र फ्रान्सका १ जनालाई निष्कासन गरिएको विभागले जनाएको छ।
पर्यटक भिसामा आएर नेपालमा १ सय ५० दिनभन्दा बढी बस्न पाइँदैन। ‘ओभर स्टे’ बसे ५० हजार जरिवाना र हरेक दिनको ५ डलर भिसा फि तिर्नुपर्छ।
नेपालले पछिल्लो पाँच वर्षमा भने ३७ देशका एक हजार तीन सय पाँच जना विदेशी नागरिकलाई निष्कासन गरेको गरिसकेको तथ्यांक विभागसँग छ।
पर्यटक भिसामा आएर नेपालमा नै लुकिछिपी बस्नेहरुलाई उनीहरुकै देश पठाइएको महानिर्देशक न्यौपानेले बताए।
नेपालबाट निकालिएका विदेशी नागरिकहरु सबैभन्दा बढी लागुऔषध कारोबारमा संलग्न भएको पाइएको अध्यागमन विभागले जनाएको छ।
त्यसो त नेपालमा सामान्य चोरीका घटनादेखि हत्या, तस्करी, कालोबजारी, ठगी र विदेशी मुद्रा अपचलनजस्ता अपराधमा पनि विदेशी नागरिकको संलग्नता बढिरहेको प्रहरी तथ्यांकले देखाउँछ।
२०६९ सालमा नेपालमा १२ देशका २० नागरिक विभिन्न अपराधमा पक्राउ परेका थिए भने २०७१ सालमा आइपुग्दा यो संख्या बढेर दोब्बर भएको छ ।
संक्रमणकालको फाइदा उठाउँदै विदेशी नागरिकले नेपाललाई ट्रान्जिट बनाएर संगठित अपराध गर्ने क्रम बढेको छ।
विदेशीहरु नेपाल आएपछि उनीहरु कहाँ के गर्छन् भन्ने नियमन गर्ने प्रणाली छैन। भिसा अवधि सकिएपछि विदेशी नागरिकको खोजीनिती गर्ने संयन्त्र नहुँदा नेपालमा लुकेर बस्ने तथा अपराधमा संलग्न हुने क्रम बढेको छ।