फ्रान्समा जारी १६ औं संस्करणको युरोपियन च्याम्पियनसीपमा आज रातिदेखि प्रि-क्वाटरफाइनल चरणका खेलहरु सुरू हुँदैछन्।
नकआउट चरणको पहिलो खेलमा साँझ ६:४५ मा समूह ए को उपबिजेता स्वीट्जरल्याण्डले समूह सी को उपबिजेता पोल्याण्डको सामाना गर्दैछ।
आज हुने खेलको विजेताले क्वार्टरफाइनलमा क्रोएशिया र पोर्चुगलबीचको आजै हुने खेलको बिजेतासँग प्रतिस्पर्धा गर्नेछ।
उत्तरी आयरल्याण्ड र युक्रेनलाई समान १–० को अन्तरमा पराजित गरेको पोल्याण्डले यसअघि जर्मनीलाई गोलरहित बराबरीमा रोकेर सनसनीपूर्ण खेल प्रस्तुत गरेको थियो। अहिलेसम्म गोल नखाएको पोल्यान्ड पनि जर्मनीपछि दोस्रो स्थानमा रहेर अन्तिम १६ को यात्रा तय गर्न सफल टोली हो।
यता समूह ए बाट अपराजित बन्दै पहिलो पटक अन्तिम १६ मा पुग्ने क्रममा स्विटजरल्याण्डले अल्वानियालाई पराजित गरेको थियो भने रोमानिया र फ्रान्ससँग बराबरी खेलेको थियो।
समूह चरणमा दुवै टोलीको प्रदर्शन मध्यम नै रह्यो। स्विट्जरल्याण्ड आयोजक फ्रान्स सम्मिलित समूहबाट उपविजेता बन्दै अन्तिम १६ मा पुगेको हो भने पोल्याण्ड समूह सी को उपविजेता बनेको हो।
स्विट्जरल्याण्ड र पोल्याण्ड दुवै टोली पहिलो पटक युरोकपको समूह चरण पार गर्दै नकआउट चरणमा पुगेका हुन्।
हेड टु हेड
स्वीट्जरल्याण्ड र पोल्याण्ड अहिलेसम्म १० पटक आमने सामने भएका छन् । जसमा पोल्याण्ड अगाडि छ । पोल्याण्डले ४ खेल जितेको छ भने स्वीट्जरल्याण्डले १ खेल जितेको छ । ५ खेल बराबरीमा सकिएको छ ।
पछिल्लो पटक सन् २०१४ मा भएको मैत्रिपूर्ण खेल २-२ को बराबरीमा सकिएको थियो । त्यसअघि सन् २०११ भने पोल्याण्डले ४-० ले जितेको थियो ।
हेर्न लायक खेलाडीहरू
पोल्याण्डका सेन्टर मिडफिल्डर बार्तोज कपुत्स्का लगातार दुई खेलका पहेँलो कार्ड ब्यहोरेका कारण आजको खेल खेल्न पाउनेछैनन् ।
आर्सनलका गोलकिपर वोज्सिच सेजेज्सी नर्दन आयरल्याण्डबिरुद्धको खेलमा थाइ इन्ज्युरीका कारण अझै खेलमा फर्कन सकेका छैनन्। उनलको स्थानमा लुकास फावियान्स्कीले पोल्याण्डको पोष्ट सम्हाल्ने निश्चित छ ।
- स्ट्राइकर रोबर्ट लेवान्डोस्की-पोल्याण्ड
- मिडफिल्डर ग्रानित जाका स्वीस
- भ्लादिमिर पेट्कोभिक- स्वीस
- फर्वार्ड ब्रील एम्बोलो-पोल्याण्ड