खोटाङ घर भएका जसवन्त राई पछिल्लो समय काठमाडौं बाफल बस्दै आएका थिए। उनलाई महानगरीय प्रहरी अपराध महाशाखाले एक सातादेखि पक्रन खोजिरहेको थियो।
महाशाखाका प्रहरी प्रवक्ता एसपी सहकुल थापाका अनुसार उनी कलंकी र कालिमाटीलाई आधारक्षेत्र बनाएर आपराधिक गतिविधि गर्थे। साताअघि कलंकीस्थित ड्रिम्स गेस्ट हाउसमा २१ वर्षीय राई दुई दिन बसे। होटलधनी छेसाङ लामाले पैसा माग्दा राईले उल्टै मुक्का हाने। उनले कलंकीकै स्काइप प्यालेसका धनी शिवभक्त रानालाई थर्काएर असुल्न पनि खोजेका थिए।
यी दुवै जना यही उजुरी गर्न महाशाखामा आएपछि प्रहरी राईको पछि लागेको थियो। यसअघि मौखिक रुपमा गुनासोमात्र आउने गर्थ्यो। यही उजुरी राईसम्म पुग्ने माध्यम बन्यो।
केही सार्वजनिक अपराध र ज्यान मार्ने उद्योगको मुद्दा खेपिसकेका राईको ‘कनेक्सन’ इन्काउन्टरमा मारिएका गुन्डा नाइके कुमार घैंटे समूहसँग जोडिएपछि प्रहरीले उनीमाथि थप नजर लगाएको थियो। गुन्डा नाइके दिनेश अधिकारी र घैंटेको इन्काउन्टरपछि राजधानीको अपराध सुसूप्त बन्दै गइरहेको प्रहरी दाबी थियो।
प्रहरीका अनुसार घैंटे समूहमा रहेर आपराधिक गतिविधि गर्ने समीरमानसिंह बस्नेत अहिले ‘भूमिगत’ छन्। बस्नेतसँग राईको ‘साँठगाँठ’ रहेको प्रहरीले जनाएको छ। ‘समीरमानसिंह बस्नेतसँग उसको आपराधिक सम्बन्ध रहेको हामीले पत्ता लगाएका छौं,’ महाशाखा प्रमुख सर्वेन्द्र खनालले सेतोपाटीसँग भने, ‘कलंकी क्षेत्रबाट धेरै नै गुनासो आउन थालेपछि ऊ हाम्रो निगरानीमा परेको थियो।’
खनालका अनुसार राईविरुद्ध मौखिक उजुरी प्रशस्तै आउँथे। तर लिखित रुपमा विवरण खुलाएर नआउने ती उजुरीले पक्रन अप्ठेरो परेको थियो। पछिल्लो उजुरी राईको नजिक पुग्ने साधन बन्यो।
‘कालिमाटी एरिया, तरकारी बजार र कलंकी होटल व्यवसायीलाई धम्क्याएर हप्ता असुल्ने गरेर हैरान पारिरहेको गुनासो थियो,’ खनालले भने।
बिहीबार झन्डै पौने १ बजेतिर प्रहरीको गस्ती टोलीले राईलाई बिजुलीबजारको पुलमुनिबाट पक्रन खोजेको थियो। खनालका अनुसार मोटरसाइकलमा रहेको केही जनाको समूहमा राई थिए।
सादा पोसाकको प्रहरी टोलीले उनलाई समात्न खोजेको थियो। तर साथमा बोकेको रडले प्रहरीलाई नै हिर्काउन खोजेपछि प्रहरीले उनमाथि गोली चलायो।
‘पक्रिन खोज्ने प्रहरीलाई रडले हिर्काउने प्रयास गरेपछि सुरक्षाका लागि गोली चलाइएको हो,’ एसएसपी खनालले भने, ‘हाम्रो टोलीले सकुशल पक्रन खोजेको थियो।’
पेस्तोलबाट चलाइएको दुई गोली राईको दाहिने खुट्टाको तिघ्रा र पिँडुलामा लागेको छ। खतरामुक्त राईको वीर अस्पतालको ट्रमा सेन्टरमा उपचार भइरहेको छ।
उपचार सकिएपछि राईलाई हिरासत लिएर अनुसन्धान थाल्ने जनाएको छ। ‘उनीमाथि लाग्ने गरेका अन्य आरोपबारे पनि हामी अनुसन्धान गरेर मुद्दा अगाडि बढाउँछौं,’ प्रवक्ता थापाले भने।
राई यसअघि दुई वटा ज्यान मार्ने उद्योग मुद्दामा परिसकेका थिए। डेढ वर्षको अवधिमा दुई ज्यान मार्ने उद्योग र तीन वटा सार्वजनिक अपराधमा उनलाई प्रहरीले पक्रेको थियो। ज्यान मार्ने उद्योगमा उनी धरौटीमा छुटेको प्रहरीले जनाएको छ।
राईको समूहमा को–को थिए तिनीहरूको खोजी भइरहेको महाशाखाले जनाएको छ।
इन्काउन्टर योजना हैन : खनाल
पछिल्लो समय प्रहरीले राजधानीमा हुने अपराध नियन्त्रणका निम्ति गुन्डागर्दी गर्नेका नाइकेलाई इन्काउन्टर गर्ने रणनीति बनाएको थियो। महाशाखा प्रमुख खनालले भने भरसक गोली चलाउनु नपरोस् भन्ने प्रहरीको उद्देश्य रहेको बताए।
तर आफैंमाथि आइलागेपछि भने नछोड्ने खनालले बताए।
‘इन्काउन्टर गरेको भए कम्मरमाथि गोली चल्थ्यो,’ खनालले भने। बिहीबार महाशाखाको टोलीलाई कर्तव्य पूरा गर्ने क्रममा आक्रमण भएपछि गोली चलाउनु परेको उनले बताए।
