अफगानिस्तानको राजधानी काबुल घटनामा मारिएका जितेन्द्रसिंह थापाको बुटवलस्थित घरमा मंगलबार पुग्दा दिउँसै पनि सुनसान थियो।
वडा नं. १३ देवीनगरस्थिन विजयपथमा रहेको दुईतले पक्की घरको माथिल्लो तलाको एउटा कोठामा जितेन्द्रकी श्रीमती गौमती थापा, छोरा बिमल र गौमतीकी आमा बसन्ती थापासँगै तीन-चार जना छिमेकी महिलाहरु थिए।
३९ वर्षीय गौमती चुपचाप थिइन्, छोरा बिमल टोलाइरहेका थिए।
ब्रिटिश आर्मीमा भर्ती हुन तयारी गरिरहेका १८ वर्षीय बिमलसँग आइतबार साँझ ५ बजे जितेन्द्रले फोनमा कुरा गरेका थिए। त्यही फोनको कुराकानी नै उनको परिवारसँगको अन्तिम कुराकानी हुन पुग्यो।
‘म नाइट ड्युटीमा छु घरमा मम्मी र दाइको हालखबर के छ तिम्रो तयारी कस्तो छ तालिम लिएको छ कि छैन भनेर सोध्नु भएको थियो त्यही फोन नै बुबासँगको अन्तिम फोन हुन पुग्यो,’ बिमलले भने।
सोमबार बिहानको घटना भए पनि थापा परिवारले साँझमात्र यसबारे जानकारी पाएको थियो। बिमलले सोमबार साँझ काठमाडौंबाट कसैले फोन गरेर घटनाबारे जानकारी गराए पनि पत्यार नलागेको र पछि समाचार हेरेपछि विश्वास गरेको बताए।
‘घटना सुन्दा सुरुमा पत्यार नै लागेन पछि इन्टरनेट हेर्दा साँचो रहेछ, बुबाको फेसबुक पेज खोलें, १३ घण्टादेखि एक्टिभ थिएन, अनलाइन पनि आउनुभएन समाचारमा आएको नाम सबै विवरण हेरेपछि बुबा नै पर्नुभएछ भन्ने पक्का भयो,’ उनले भने।
सिद्धार्थ गौतमबुद्ध क्याम्पस बुटवलमा कक्षा ११ मा पढ्दै गरेका बिमलले असार १३ गते पोखराबाट व्रिटिस आर्मीको लागि फारम भर्ने तयारी गरिरहेका छन्। जेठो छोरा मनिष विटीआई बुटवलमा मेकानिकल पढ्दै छन्।
सात वर्षअघि भारतीय सेनाबाट अवकास पाएका ४३ वर्षीय जितेन्द्र गत फागुनमा दोस्रोपटक काबुल पुगेका थिए। यसअघि पनि दुई वर्ष काबुल बसेर फर्किएका जितेन्द्र त्यतिबेला दुई वर्ष नेपाल बसी फेरि काबुल पुगेका थिए।
२०५० सालमा विवाह गरेका जितेन्द्रले दुई वर्षपहिले सविता लामासँग दोस्रो विवाह गरेपछि जेठी श्रीमती गौमतीसँगको सम्बन्ध टाढिएको थियो। अहिले पनि गौमती दुई छोरासँग बुटवलको घरमा बस्छिन्। सविता भने काठमाडौं कहाँ बस्छिन् गौमतीलाई थाहा छैन। जितेन्द्र काबुल कसरी गए भन्ने पनि गौमती र छोराहरुलाई थाहा छैन।
‘विवाह गरेर काठमाडौंमा बसेको थाहा पाए पनि सबितासँग हाम्रो देखभेट भएको छैन। उता पनि तीन महिना पहिले बच्चा जन्मिएको छ भन्ने सुनेको छु,’ उनले भनिन्।
दोस्रो विवाहपछि आफूहरुलाई खासै आर्थिक सहयोग नगरेको र घरभाडाबाट आएको रकमले छोराहरुको खर्च चलाउँदै आएको गौमतीले बताइन्।
विगतका घटना जे-जस्तो भए पनि जितेन्द्रको शव नेपालमै ल्याएर अन्तिम संस्कार गर्ने गौमतीको चाहना छ। विदेशी भूमिमा ज्यान गुमाए पनि शवलाई नेपाल ल्याउने व्यवस्था मिलाउन परिवारले सरकारलाई आग्रह गरेको छ।