मिर्गौलाको पत्थरीबाट पीडित बुटवलका युवकले काठमाडौंको एक अस्पतालले उपचारको नाममा ठगी गरेको आरोप लगाएका छन्।
रौतहट चन्द्रनिगाहपुर घर भई हाल बुटवल कालिकानगर बस्दै आएका ३३ वर्षीय युवराज कार्कीले मिर्गौलाको पत्थरी निकाल्न काठमाडौंको ग्राण्डी अस्पतालले १ लाख ४० हजार रूपैया लिए पनि मिर्गौलाको पत्थरी त्यसै छाडि दिएको बताएका छन्।
गत असार १८ गते अस्पतालका डा. प्रेमराज ज्ञवालीले आरएआईएस विधिबाट शल्यक्रिया गरेर निकालेको पत्थरी जस्ताको तस्तै रहेकाले अस्पतालले ठगी गरेको उनले आरोप लगाएका छन्।
सल्यक्रिया पछि अस्पतालले दिएको भिडीयो क्लिप पनि आफ्नो नभई अरू कसैको दिईएको उनले आरोप लगाएका छन्।
‘ऋण गरेर उपचार गरे पनि रोग निको हुनु त कता हो कता रोगीले सोध्न खोजेको कुराको जवाफ नदिएर अस्पतालले मलाई मानसिक तनाव दिएको छ,’ बुटवलमा आयोजित एक कार्यक्रममा उनले भने।
सामान्य मजदुर गर्ने आफूलाई अस्पतालले रकम लिएर पनि उपचार नगरी पठाउँदा ठूलो अन्याय गरेको कार्कीले गुनासो गरे।
अस्पतालले दाहिने मिर्गौलामा रहेका ११ एमएम र ८ एमएमका दुईवटा पत्थरी निकाल्न अप्रेसन गरे पनि अहिले दुवै पत्थरी जस्ताको तस्तै रहेको उनले दाबी गरेका छन्।
कार्कीका अनुसार अप्रेसन पछि डा. ज्ञवालीले एउटा पत्थरी मिर्गौलामा गढेको कारण निकाल्न नसकिएको बताएका थिए। तर अर्को पत्थरी समेत त्यसै रहेको उनले बताए।
अप्रेसन पछि पनि पेट दुख्न निको नभएपछि पटकपटक अस्पताल धाएका उनले बुटवल र वीर अस्पताल काठमाडौंमा गरिएको भिडीयो एक्सरेमा दुवै पत्थरी अझै पनि मिर्गौलामा जस्ताको तस्तै देखिएको उनले बताए।
अप्रेसन शुल्क, बेड चार्ज, ल्याब तथा अन्य विभिन्न परिक्षण गरी करिब डेढ लाख रूपैया खर्च गरे पनि अस्पतालले आफ्नो कुनै उपचार नगरेको उनको आरोप छ।
आफ्नो अवस्थाबारे अस्पतालका प्रबन्ध सञ्चालक चक्रराज पाण्डेलाई भेटी सबै जानकारी गराए पनि कुनै उपलब्धि नभएको दुखेसो उनले पोखे।
कार्कीले अस्पतालले रकम लिएर पनि उपचार नगरी ठगी गरेको भन्दै जिल्ला प्रशासन कार्यालय रुपन्देही र जिल्ला जनस्वास्थ्य कार्यालयमा निवेदन समेत दिएका छन्।
अप्रेसन पूर्व घण्टौं समय दिने चिकित्सकले अहिले भेट्न खोज्दा पनि भेट गर्न नमानेको र मोबाईल समेत नलाग्ने गरी राखेको उनको गुनासो छ।
बुटवलको एउटा प्लस टु मा सामान्य चमेना गृह सञ्चालन गर्दै आएका कार्कीले विगत एकवर्ष यता अस्पताल धाउने गर्दा व्यापार समेत ठप्प भएको बताए।
