विराटनगरबाट काँकडभिट्टा जाँदै गरेको बस शुक्रबार दिउँसो शिवसताक्षी नगरपालीका-९ स्थित माईधार सडकखण्डमा पल्टिँदा एक जनाको मृत्यु भएको छ। मृत्यु हुनेमा खजुरगाछी झापाका ५० वर्षीय घनश्याम राजवंशी छन्।
गम्भीर रहेका राजवंशीको बी एण्ड सी अस्पतालमा उपचारको क्रममा मृत्यु भएको प्रहरीले जनाएको छ। घटनामा अन्य १२ जना यात्रु घाइते भएका छन्।
मे.३प. ८३४८ नम्बरको मोटरसाइकललाई ओभरटेक गर्ने क्रममा तीब्र गतिमा रहेको ना.५ख. ४६५ नम्बरको यात्रुबाहक बस राजमार्गमा पल्टिएको थियो । प्रत्यक्षदर्शीका अनुसार मोटरसाइकललाई उछिन्ने हुँदा सो बस राजमार्गको किनारमा रहेको तारजालीले बाँधेको ढुँगाको बारमा ठोक्किएर अनियन्त्रित भई सडकमा पल्टिएको थियो।
घाइतेमध्ये चन्द्र राजवंशीको अवस्था गम्भीर रहेको छ। मृतक र घाइते राजवंशी दुबै जना मोटरसाइकलमा सवार थिए। सडकमा पल्टिएको बसले सो मोटरसाईकललाई थिचेको थियो। मोटरसाइकलमा सवार दुबै जना उछिट्टिएर सडक किनारमा पुगेका प्रहरीले जनाएको छ।
घाइते भएका भारत दार्जीलिङका सुमित्रा गुरुङ, राजु क्षेत्री, नरमाया चुँडाल तारादेवी चुडाल, तुलसा तिम्सिनाको बी एण्ड सी अस्पतालमा उपचार हुँदैछ। यस्तै इटहरीकी सजना तामाङ, झापा खुदुनावारीका विजय गौतम, विर्तामोडकी दीपिका खरेल, मोरङ बेलबारीका कृष्ण गुरुङ, झापा गौरादहका तिलक थापा, गौरीगन्जका नीलम पौडेल, अपेक्षा खरेलको झिलझिलेस्थित पुनर्जीवन हेल्थ केयर सेन्टरमा उपचार भइरहेको ईलाका प्रहरी कार्यालय झिलझिलेका प्रहरी निरीक्षक कुन्दन देवले बताए।
