अख्तियार दुरुपयोग अनुसन्धान आयोग सुदूरपश्चिम क्षेत्रीय सम्पर्क कार्यालय महेन्द्रनगरको टोलीले सोमबार साँझ जिल्ला वन कार्यालय कैलाली अन्तर्गतका दुई कर्मचारीलाई घुससहित नियन्त्रणमा लिएको छ।
सेक्टर वन कार्यालय बलचौरमा कार्यरत सहायक बन अधिकृत राजकुमार मल्ल र ईलाका वन कार्यालय जगतपुरमा कार्यरत रेञ्जर बाबुराम मिजारलाई घुससहित रंगेहात पक्राउ गरेको हो।
अख्तियारले सेक्टर बन अधिकृत मल्ललाई नगद २५ हजार ५ सय र इलाका बन कार्यालय जगतपुरका रेन्जर मिजारलाई नगद ५१ हजार घुस लिइरहेको अवस्थामा पक्राउ गरिएको आयोगका निमित्त प्रमुख विष्णुसिंह बिष्टले जानकारी दिए।
बिष्टका अनुसार नारायणपुर गाबिस वार्ड नं. ९ बैदी स्थित घाटगद्दीमा रहेको काठमा बिमार्का (टाँचा लगाउने कार्य) गरेबाफत दुबै जनाले उक्त रकम घुस लिएका थिए।
दुवै जनाले लिएको नगद रु ७६ हजार ५ सय घुससहित पक्राउ परेका उनिहरु माथि थप अनुसुन्धान भइरहेको अख्तियारको सुदूरपश्चिम क्षेत्रीय कार्यालयले जनाएको छ।
तर जिल्ला वन कार्यालय कैलालीका वन अधिकृत डा. सिन्धु ढुङ्गानाले यस बारेमा आधिकारिक रुपमा आफूलाई कुनै जानकारी नआएको बताए। उनले भने –‘मैले पनि सुनेको चाँही हो तर मलाई कुनै जानकारी गराईएको छैन।’
