काठमाडौंका प्रमुख जिल्ला अधिकारी रामकृष्ण सुवेदीले सार्वजनिक स्थानमा सुर्तीजन्य पदार्थ सेवन गर्ने प्रवृत्तिलाई निरुत्साहित गर्न जिल्ला जनस्वास्थ्य कार्यालयले प्रभावकारी भूमिका निर्वाह नगरेको आरोप लगाएका छन्।
एक्सन नेपाल नामक संस्थाले मंगलबार काठमाडौंमा गरेको कार्यक्रममा काठमाडौंका प्रमुख जिल्ला अधिकारी सुवेदीले कानून कार्यान्वयन गरेर भन्दा सचेतनाका कार्यक्रम संचालन गरेर मात्र सुर्तीजन्य पदार्थको सेवनलाई निरुत्साहित गर्न सकिने भन्दै जिल्ला जनस्वास्थ्य कार्यालयले सचेतनाका कार्यक्रम संचालन गर्न चासो नदेखाएको आरोप लगाए।
उनले जनस्वास्थ्य कार्यालयले सचेतनाका कार्यक्रम संचालन गर्न चासो नदिएपनि प्रशासनले भने कानूनको प्रभावकारी कार्यान्वयन गरिरहेको दाबी गर्नुभयो। उहाँले सुविधा सम्पन्न र पढेलेखेकाहरुले नै सार्वजनिक स्थानमा सुर्तीजन्य पदार्थको सेवन गर्ने गरेको भन्दै प्रशासनले कसैलाई पनि उन्मुक्ति नदिएको बताए।
काठमाडौका प्रहरी प्रमुख विक्रमसिंह थापाले सार्वजनिक स्थानमा सुर्तीजन्य पदार्थ सेवन गर्नेहरुबाट प्रहरीले चालु आर्थिक वर्ष सात लाख रुपैयाँ जरिवाना असुल गरेको बताए। कानूनमा सार्वजनिक स्थानमा सुर्तीजन्य पदार्थ सेवन गर्नेलाई १ सय रुपैयाँ जरिवाना गराउने व्यवस्था छ।
काठमाडौंका प्रहरी प्रमुख थापाले सुर्तीजन्य पदार्थका कारण क्यान्सर लागेर ज्यान गुमाउनेको संख्या बढिरहेको भन्दै राजस्वको लोभ गर्नुको साटो सुर्तीजन्य पदार्थको सेवनमा प्रतिबन्ध नै लगाउनुपर्ने बताए।
कार्यक्रमका सहभागीहरुले प्रहरी प्रशासनको एक्लो प्रयासले मात्र सार्वजनिक स्थानमा सुर्तीजन्य पदार्थको सेवनलाई नियन्त्रण गर्न नसकिने बताए ।
