नवौं अर्न्तराष्ट्रिय सगरमाथा दिवसका दिन नौ जना आरोहीलाई नगद रकमसहित सम्मानित गरिने भएको छ।
पर्यटन मन्त्रालयका सचिव प्रेमकुमार राई अध्यक्ष रहेको अर्न्तराष्ट्रिय सगरमाथा दिवस मूल आयोजक समितिले मंगलबार काठमाडौंमा पत्रकार सम्मेलन गरेर जेठ १६ गते मनाइने नवौं अर्न्तराष्ट्रिय सगरमाथा दिवसका दिन नौ जना नेपाली आरोहीलाई नगद रकमसहित सम्मान गर्ने जानकारी दिएको हो।
ती आरोहीले आफ्नो ज्यान जोखिममा पारेर सगरमाथा आरोहणमा सजिलो होस् भनेर अप्ठ्यारा ठाउँमा डोरीको व्यवस्था गरेका कारण जनही ५० हजार रुपैयाँसहित सम्मानको निर्णय गरिएको सचिव राईले जानकारी दिए। ती नौ जना आरोहीलाई प्रदान गरिने नगद रकम नेपाल पर्वतारोहण संघले उपलब्ध गराउने छ।
सगरमाथा आरोहणका क्रममा हिम पहिरोमा परेर १६ जना आरोहीको मृत्यु भएका कारण तथा गत वर्षको भूकम्पका कारण तीन वर्षदेखि सगरमाथाको आरोहण रोकिएकामा यसवर्ष ४ सय भन्दा बढीले सगरमाथाको सफल आरोहण गरेका छन्।