आज बुद्ध जयन्ती। आजको दिन काटमार गर्न नहुने मान्यता रहेको छ। तर सिरहाको लहान नपा १५ ढोढनास्थित राजदेवी पञ्चाबती मन्दिर क्षेत्रमा रगतको खोलो नै बग्यो। मनोकांक्षा पुरा भएकाहरू हजारौं बोका तथा परेवा, हाँस लगायतका पशुपक्षीको बली चढाएपछि मन्दिर क्षेत्रमा रगतको खोलो बगेको हो। मन्दिर परिसर बिहानैदेखि रग्ताम्मे बनेको छ।
यो समाचार तयार पार्दासम्म करिब १० हजार बोबाको बली चढि सकेको छ। अझै बली चढाउने क्रम जारी छ। साँझसम्म बढी चढ्ने मन्दिर संरक्षण समितिका सल्लाहकार तेजुलाल चौधरीले बताए। उनले भने, ‘गत वर्ष करिब १४ हजार बोकाको बली चढेको थियो भने यो वर्ष अन्दाजी १८/२० हजार बोकाको बली चढ्ने हाम्रो अनुमान छ।’
मन्दिरमा बली चढाउनेहरू बिहानैदेखि लाइनमा बसेका छन्। एउटा बोकाको बली चढाउन करिब ५ घन्टा लाइनमा बस्नु पर्छ। व्यवस्थापनका लागि स्वयंमसेवक, नेपाल तथा सशस्त्र प्रहरी सयौंको संख्यामा तैनाथ गरिएको छ।
भीड र चर्को घामका कारण पटक पटक भागदौड मच्चिएको छ। प्रहरीले भीड थाम्न नसक्दा लाठी समेत चार्च गर्नुपरेको छ।
बोका काट्न कम्तिमा १० जना खटेका छन् । उनीहरुलाई बोका काट्न भ्याइ नभ्याई छ।
मन्दिरका पुजारी लक्ष्मी बहादुर भट्टका अनुसार राजदेवी माताले वैशाख पूर्णिमाका दिन आफ्नो मन्दिरमा बलि चढाएमा सबैको फलिफाप हुने भनी सपनामा बताएपछि त्यहाँ वलिप्रथा सुरू भएको हो।
पहिले भाकल गर्नेहरुले बली मात्र चढाउथे भने अब बहुमुल्य धातु (सुन) पनि चढाउँछन्।
‘पहिले ढोढनाबासीले मात्र बली चढाउन सुरू गरेँ’, पूजारी भट्टले भने, ‘५/६ बर्ष यतादेखि सप्तरी, धनुषा, महोत्तरी लगायत मधेसका अधिकांश जिल्ला र भारत विहारबाट समेत श्रद्धालुरु बली चढाउन आइपुग्छन्।’
मन्दिर लहान बजारदेखि आठ किलोमिटर उत्तरमा पर्छ।