कञ्चनपुरको महेन्द्रनगरमा रहेको होटल संगममा कार्यरत दुई जना मजदुरको हत्या भएको छ। अर्का एकजना गम्भीर घाइते भएका छन्।
महेन्द्रनगरको गल्ली नम्बर–४ मा रहेको होटल संगममा महेन्द्रनगरसँगै जोडिएको दैजी नगरपालिका–५ का ४५ वर्षीय कृष्ण विष्ट र बाजुराका २१ वर्षीय भीम रोकायाको गएराति हत्या भएको जिल्ला प्रहरी प्रमुख एसपी तुलसी अधिकारीले जानकारी दिए। दुवैजना होटलकै मजदुर रहेको खुलेको उनले बताए।
मृतक दुवैजनाको शरीरमा धारिलो हतियार प्रयोग भएको पाइएकाले हत्या भएको पुष्टि भएको प्रहरीले जनाएको छ। उनीहरुको गएराति नै हत्या गरिएको भएपनि शुक्रवार विहानमात्रै प्रहरीले घटनाबारे जानकारी पाएको थियो।
घाइते अवस्थामा फेला परेका दोधारा चादँनीका ४२ वर्षीय पदम जोशीलाई उपचारका लागि बाँकेको कोहलपुर पठाइएको अधिकारीले बताए। घटनाबारे अनुसन्धानका लागि होटलका मालिक र कर्मचारीलाई प्रहरीले आफ्नो नियन्त्रणमा लिएर अनुसन्धान सुरु गरेको छ। हत्या कसले किन गरेको हो भन्नेबारे केही खुल्न नसकेको प्रहरीले जनाएको छ।
मृतक रोकाया ६ महिना र विष्ट एक वर्षदेखि संगम होटलमा काम गर्दै आएका थिए ।