रुकुम आठविसकोट दाजेका आगलागी पीडितलाई बीच बाटोमा बोलाएर राहत वितरण गरिएको छ।
जिल्ला विपद् व्यवस्थापन समितिका अध्यक्ष तथा रुकुमका प्रमुख जिल्ला अधिकारी वंशीकुमार आचार्य नेतृत्वको टोली घटनास्थलमा नपुगी हालै बीच बाटोमै राहत छोडेर फर्किएको छ।
आगलागी पीडितका लागि भनेर सङ्कलित नगद, खाद्यान्न तथा गैरखाद्यान्न वितरण गर्न गएको प्रजिअ आचार्य नेतृत्वको टोली आठविसकोटको खारखारेबाटै फर्किएको हो। रुकुम सदरमुकाम खलङ्गाबाट गाडी चढेर गएका प्रजिअ आचार्यसहितको टोली गाडीको सुविधा भएको ठाउँसम्म मात्र पुगेका थिए। खारखारेबाट घटनास्थल दाजेमा पुग्न करिब दुई घन्टाको उकालो हिँड्नुपर्छ।
तर यातायातको सुविधा नभएका कारण उहाँ बीच बाटोबाटै फर्किनुभएको हो। खारखारेमै पीडितलाई बोलाएर जिल्ला विपद् व्यवस्थापन समितिको तर्फबाट प्रतिघर परिवार रु पाँच हजार, जिल्ला विकास समितिको तर्फबाट प्रतिघरपरिवार एक हजार र रेडक्रस रुकुमको तर्फबाट खाद्य तथा गैरखाद्य सामग्री प्रदान गरिएको थियो।
पीडितलाई प्रदान गरिएको नगद, लत्ताकपडा र भाडाकुँडा लिएको भएपनि अन्य खाद्य सामग्री भने खारखारेमै थन्किएको छ। त्यसबारेमा प्रजिअ आचार्यले भने 'आफूहरुले नबोलाएको भए पनि पीडित केही तल झरिसकेका कारण घटनास्थलमा नपुगी त्यहीँबाट राहत प्रदान गरेको हो।'
वैशाख १४ गते भएको आगलागीका कारण रुकुम आठबिसकोट–३ दाजेका १० घर जलेर नष्ट भएका थिए। अहिले पीडित परिवार अर्काको घरमा सहारा लिएर बसिरहेका छन्। राहत वितरण टोली बीच बाटोबाटै फर्केपछि अग्निपीडितले खिन्नता प्रकट गरेका छन्।
'जिल्लाका प्रमुख हाम्रो यो खरानी भएको बस्तीमा आउलान् र वास्तविक रुपमा भएको क्षति हेर्लान् भन्ने सोचेका थियौँ, तर सिडियोसाप यहाँ आउनुभएन' आगलागी पीडित तप्त दमाईंले भने, 'हामी छिट्टै फर्कनुपर्छ, पीडितलाई तलै बोलाउनुहोस् भन्ने सन्देश आएका कारण हामीले तल खारखारेमै गएर राहत बुझ्यौँ।'
उनका अनुसार सम्पूर्ण राहत सामग्री घरसम्म पनि लैजान अझै सकिएको छैन। उक्त राहत सामग्री खारखारेकै एउटा घरमा राखिएको छ। गाडीको सुविधा भएको ठाउँसम्म मात्र आएको र उकालो हिँड्न जिल्लाका प्रमुख नचाहँदा प्रजिअको टोली बीचबाटोबाटै फर्किएको हो। रासस