अस्पताल, जहाँ उपचार गरेर जाती भइ फर्किने विश्वास बिरामीको हुन्छ। यो संवेदनशील स्थलमा बिरामी कति सुरक्षित छन्? शनिबार विराटनगरमा भएको एउटा घटनाले बिरामीप्रति डाक्टरले गरेको क्रुरता उदांगो पारेको छ।
झापा शनिश्चरे–८ की ३८ वर्षीया विश्वकर्मा थरीकी महिला साँझ नोबेल अस्पताल भर्ना भइन्। पित्तथैलीमा पत्थरी भएर भर्ना भएकी उनलाई आइतबार अप्रेसन गर्ने चाँजोपाँजो मिलाइँदै थियो।
सर्जिकल वार्डको ४९ नम्बर बेड । त्यहाँ उनलाई अप्रेसनपूर्व आवश्यक उपचारका निम्ति राखिएको थियो । डाक्टर नर्सले बेला–बेला रेखदेख गरिरहेकै थिए ।
रात छिप्पिँदै गयो ।
रातिको ड्युटी डाक्टर सञ्जीव चौधरीको नेतृत्वमा थियो ।
९ बजेर केही कटेपछि ।
सञ्जीव महिला राखेको बेड आइपुगे । के–कस्तो छ ? भनेर सोधे ।
‘पेट दुखिरहेकै छ,’ बिरामीले भनिन् ।
‘उसोभए एउटा औषधी लिनुहोस्,’ सञ्जीवले भने, ‘त्यसका लागि यता आउनुस् ।’
उठिन् । हिँडडुल गर्न त्यति कठीन थिएन । सञ्जीवले उतापट्टि ‘पर्सनल रुम’तिर देखाउँदै भने, ‘हिँड्नुस् त !’
सञ्जीवले जता भने उतै हिँडिन् । रुमभित्र छिरेपछि डाक्टरले चुकुल मारे ।
कपडा खोल्न लगाए । बाहिरी वस्त्र खोल्न गाह्रो मानिनन् । डाक्टरले पूरै वस्त्र खोल्न अह्राए ।
असजिलो हुँदै पनि डाक्टरले भनेपछि आज्ञाकारी बन्दै गइन्। नांगिँदै गइन्। उनको शरीरबाट सबै कपडा हटेपछि पनि डाक्टरले औषधी दिएनन्।
‘खै औषधी ?’ डाक्टरमाथि प्रश्न खन्याइन्।
डाक्टरले उनको नांगिएको शरीरमा हात बढाए। त्यसपछि थाहा भयो, डाक्टरले औषधी खुवाउन नभएर उनीबाट शारीरिक सन्तुष्टि लिन ल्याएका रहेछन्।
निर्वस्त्र भएकी उनी चिच्याएपछि कुरुवाले थाहा पाए। यस्तो घटना हुनेवित्तिकै अस्पतालमा रहेको जिल्ला प्रहरी कार्यालयको युनिटले सञ्जीवलाई पक्रियो।
‘मलाई सबै लुगा खोल्न लगाएर बलात्कार गर्न खोजे, शरीरमा हात हालेर सुम्सुम्याए,’ पीडित महिलाले भनिन्, ‘अस्पताल पनि यस्तो हुँदो रहेछ।’ यो घटना भएपछि पीडितको आइतबार गर्ने भनिएको अप्रेसन भएन। ‘यस्तो नर्कजस्तो ठाउँमा कसरी उपचार गर्ने, यहाँबाट लैजाने सोच बनाएका छौं,’ आफन्त पर्मिला सुनारले भनिन्, ‘अप्रेसन गर्न ल्याएको मान्छेलाई यस्तो पनि गर्ने हो?’
पीडितका तीन छोरा र एक छोरी छन्। पक्राउ परेका डाक्टर चौधरीलाई जिल्ला प्रहरी कार्यालयको हिरासतमा राखिएको छ। प्रहरी प्रवक्ता डिएसपी दीपक पोखरेलका अनुसार उनीबाट घटनाबारे अनुसन्धान भइरहेको छ। ‘घटनाबारे प्रारम्भिक अनुसन्धान गर्दा डाक्टरले महिलालाई बलात्कार गर्न खोजेको थाहा हुन आएको छ,’ पोखरेलले भने, ‘मेडिकल जाँच गरेर थप अनुसन्धान थाल्दैछौं।’
पीडितका दाइ गोपाल कानुन व्यवसायीमार्फत पीडितको शरीरको मेडिकल जाँच गराउने तयारी भइरहेको बताउँछन्। ‘ती डाक्टरले बलात्कारै गरेको बैनीले बताएकाले मेडिकल जाँच गराउन लागिएको हो,’ गोपालले सेतोपाटीसँग भने, ‘मेडिकल जाँचका लागि कानुन व्यवसायीमार्फत प्रहरीलाई चिठ्ठी लेखिसक्यौं।’
साधारणतया महिला बिरामीको शरीर जाँच गर्नुपरे (कपडा खोलेर), स्टाफ नर्स अथवा महिला डाक्टर रोहवरमा राख्नुपर्ने नियम छ। तर सञ्जीवले एक जना महिला स्टाफको पनि सहयोग नलिई ती महिलालाई पर्सनल रुपमा छिराएका थिए।
नोबेल अस्पतालका जनसम्पर्क अधिकारी नारायण दाहालले पीडक डाक्टरलाई सेवाबाट हटाएर अस्पतालले कारबाही गरेको र बाँकी कानुनी कारबाही प्रहरीबाट हुने बताए। ‘यस्तो घटना हाम्रो अस्पतालमा कहिल्यै भएको थिएन,’ दाहालले भने। दलित अधिकारकर्मी उमेश विश्वकर्माले अमानवीय कार्य गर्ने डाक्टरलाई कडा कारबाही गर्न आफूले पनि सहयोग गरिरहेको जनाए।
