फागुन १२ गते बिहानीको रात धरान उप–महानगरपालिका २७ की १२ वर्षीय दलित बालिकाले सपनामा पनि नसोचेको पीडाको सामना गर्नुप¥यो। गाउँकै २५ वर्षीय सुजन माझीबाट उनी बलात्कृत भइन्।
बालिकाले पीडा भोगिन्, तर गाउँलेहरूले ‘मिल्नुपर्छ’ भन्दै दबाब दिन थालेपछि परिवार थप चिन्तामा परेको छ। कक्षा ५ मा पढ्दै गरेकी ती बालिकाको जीवनमा अहिले अँध्यारो छाएको छ।
तर पीडक माझी भने अहिले पनि प्रहरीको नजरमा ‘लुक्दै’ घुमिरहेका छन्। प्रहरीको सूचीमा उनी फरार छन्। करिब एक महिना हुन लाग्दासमेत पीडक पक्राउ पर्न सकेका छैनन्।
कुरा सुनिदिने कोही नभएको र आफ्नो पहुँच पनि नपुगेका कारण न्याय पाउन नसकेको पीडित परिवारको भनाइ छ।
इलाका प्रहरी कार्यालय धरानका निमिक्त कार्यालय प्रमुख प्रहरी निरीक्षक रमेशकुमार श्रेष्ठले फरार रहेकाले खोजी कार्य जारी राखेको दाबी गरे। पीडित परिवारको गुनासो प्रहरीसँग छ । ‘प्रहरीले पक्राउ गर्न चासो दिएन,’ पीडित परिवारकी ठूलीआमाले भनिन्।
आफूहरू विपन्न परिवारको भएकाले बोलिदिने कोही नहुँदा घटना सेलाउँदै गइरहेको उनको भनाइ छ। ‘गाउँलेहरु मिल्नुपर्छ भन्दै दबाब दिन्छन्,’ उनले भनिन् ।
पीडितलाई घटना भएकै दिन गाउँकै पाँच जना महिला आएर दबाब दिएका थिए। भोलिपल्ट फागुन १३ गते पनि राजनीतिक दलबलसहित मिल्नको लागि दबाब दिएको पीडितको भनाइ छ। राजनीतिक र गाउँलेको संरक्षण पाएका माझी यसभन्दा अगाडि पनि यस्तै प्रकृतिको घटनामा संलग्न थिए। छ वर्षअघि एक महिलालाई करणी गरेको अभियोग उनलाई लागेको थियो तर गाउँलेको दबाबमा त्यो घटना मिलापत्र गराइएको थियो।
आरोपित माझी आफ्नो फेसबुक अनलाइनमा देखिने गरेको तर पक्राउ नपर्ने गरेको पीडितले बताए। पीडक माझीले फागुन १२ गते विहान २ बजे ती बच्चीमाथि जबरजस्ती करणी गरेका थिए।
पीडित बालिकाका अनुसार कसैलाई भनेमा मारिदिने धम्की माझीले दिएका थिए। ‘कराउन खोजें तर मुख थुनिदिए,’ उनले भनिन्। बालिकाले बिहान आफ्ना नजिकका साथीहरूलाई भनेपछि घटना सार्वजनिक भएको थियो। ‘अहिले उनी घरभन्दा बाहिर टाढा जान सकेकी छैन,’ आमा भन्छिन्, ‘दाउरा खोज्न जाभन्दा पनि डर लाग्छ भन्छे ।’