साग खेल्ने राष्ट्रिय फुटबल टिममा हेटौंडाका ४ जना छन्- दाजुभाइ रञ्जन विष्ट, अञ्जन विष्ट, एलन न्यौपाने र सुनिल बल तामाङ।
साग फाइनल हुनुभन्दा २ घन्टाअघि २० जनाजति युवाको समूह हेटौंडा भुटनदेवीस्थित रञ्जन र अञ्जनको घरमै गए। उनीहरुले अञ्जन र रञ्जनका आमाबाबुसँगै बसेर फाइनल खेल हेर्ने इच्छा जनाए।
सबैको इच्छाबमोजिम रञ्जन र अञ्जनका बाबु राजुले नजिकै बजारबाट प्रोजेक्टर ल्याए। घरबाहिर चोकमा प्रोजेक्टर राखे। खेल सुरु भएपछि हेर्नेहरुको घुइँचो लाग्यो। जोग र जाँगरमा खेल हेरिरहेकाहरु नेपालले पेनाल्टीमा गोल खाएपछि निराश भए।
अञ्जन र रञ्जनका बाबु राजु भने 'नेपालले गोल फर्काउछ' भन्दै हौसला थप्दै थिए। नभन्दै प्रकाश बुढाथोकीले गोल गर्दै खेल बराबरीमा ल्याए। दर्शकको आवाजले हेटौंडा नै थर्केजस्तो भयो। त्यसपछि त झन घुइँचो थामिनसक्नु भयो। पाँच हजारभन्दा बढी दर्शक रञ्जन र अञ्जनको घरबाहिर चोकमा खेल हेर्दै हुटिङ गरिरहे।
नवयुगले अर्को गोल ठोके। हुटिङ बढ्यो। खेल जितेपछि फुटबल फ्यानहरुले बधाइ दिँदै राजुलाई अबिर माला लगाएर उचाले। 'खेल सकेको केहीबेरमा मानिसहरु कहाँबाट घरमा आए, कति आए गन्नै नसकिने भयो', राजुले भने, 'त्यसपछि सबै मिलेर हेटौंडामा मध्यरातै विजय जुलुस निकाल्यौं।'
खेल सकिएको २ घन्टापछि रञ्जनले बाबु राजुलाई फोन गरे। 'हाम्ले जित्यौं बाबा' भन्न नपाउँदै राजुले 'हामीले खेल हेर्यौ' भने। अहिले विजय जुलुसमा छौं भनेर मोबाइलबाट खिचेको फोटो फेसबुकको म्यासेन्जरमा हालिदिए। विजय जुलुसले हेटौंडा परिक्रमा गरेपछि त्यो जमात सबै रञ्जन-अञ्जनको घरमै पुग्यो। त्यसपछि रातभर विजय उत्सव मनाउने प्रस्ताव फुटबल फ्यानहरुले राखे।
राजु राम्रो मादल बजाउँछन्। गीत पनि गाउँछन्। घरभित्र रहेको मादल निकालेर राजुले 'यो नेपाली शिर उचाली' भन्ने गीत गाए।
गीत गाउनेमा फुटबल फ्यानहरुले 'सपोर्ट' गरे । आमा अञ्जना नाच्न थालिन्। झिसमिसे भएपछि सबै आ-आफ्ना घर गए। छोराहरुले जितेसँगै आफूहरुलाई बधाइको ओइरो आएको राजुले बताए। '२३ वर्षपछि भारतलाई हराएर इतिहास रचे, मेरा छोराले हामी आमाबाबुको मात्र नाम राखेनन्, देशकै शिर उँचो पारे,' राजुले भने, 'योभन्दा ठूलो गर्वको कुरा के हुन्छ र?'
यो पनि